Die sanger Elvis Blue trotseer op die negende dag van sy fondsinsamelingstoer behoorlik die Vrystaatse koue. Sondag 9 Junie is nie net sy negende agtereenvolgende dag op die pad nie, maar ook die merkwaardige mylpaal om die 1 000ste kilometer van sy fondsinsamelingstoer per fiets te voltooi.

Vir 'n skenking van R1 000, bied hy aan om 'n persoonlike liedjie te skryf vir diegene wat die doel ondersteun.

Dié toer het op 1 Junie in George, Oos-Kaap, begin en eindig 1500 km later in Nelspruit, waar Elvis ook aan die jaarlikse Innibos-kunstefees gaan deelneem.

Elvis lê daagliks meer as 100 km af

Hy en Shandor Potgieter van OFM se Good Morning Breakfast voltooi vandag die sentrale Suid-Afrika-been van die "Elvis Blue Rides for School Fees"-fietstoer. Die twee ywerige fietsryers het om 08:30 uit Ficksburg vertrek en sal 94,9 km na Bethlehem ry.

Die afgelope agt dae het Elvis daagliks meer as 100 km afgelê.

Op Vrydag (7/6) het  Potgieter by hom aangesluit, en saam het hulle ongeveer 102 km vanaf Smithfield na Hobhouse gery. “Ondanks die winderige toestande is ons deur pragtige natuurskoon omhels,” sê Blue.

Saterdag (8/6) het hulle 109 km van Hobhouse na Ficksburg afgelê en Blue ry Maandag (10/6) van Bethlehem na Vrede.

'Dankbaar vir elkeen wat 'n bydrae maak'

Blue het al teen die sesde dag reeds R54 000 ingesamel. “Ek is dankbaar vir elke persoon wat ’n bydrae maak.”  Hy sal ook 10 km in net sy Speedo-swembroekie moet ry nadat ’n groep mense van Pretoria sy uitdaging aanvaar het en ’n welkome R100 000-skenking gemaak het.

“Ek weier om in 'n wêreld te leef waar kinders met leë mae skool toe moet gaan en iets moet probeer leer,” sê hy. “Ek weier om net rond te sit met die wete dat daar kinders is wat nie potlode, penne, boeke of selfs skoene het om mee skool toe te gaan nie of dat daar wonderkinders, sportmanne en musiekmaestro’s is wat nooit die geleentheid sal kry om bo hul omstandighede uit te styg nie."

Volgens hom is daar sowat 9,6 miljoen honger kinders daagliks in Suid-Afrika. Voedselonsekerheid is gekoppel aan 'n wye reeks gevolge, insluitend sosiale en gedragsprobleme, en word gekoppel aan gesondheidstoestande soos belemmerde groei, swak konsentrasie en lae immuniteit.

“Suid-Afrika het ook een van die mees ongelyke onderwysstelsels ter wêreld, wat gebuk gaan onder swak of afwesige infrastruktuur, oorvol klaskamers en chroniese onderprestasie wat die toekoms van ons kinders en dus ons land in gevaar stel,” sê hy.

In vennootskap met die Atterbury-liefdadigheidstrust samel hy geld in om aanvanklik twee liefdadigheidsorganisasies te ondersteun: Life Community Services in George en die Daantjie-weeskindprojek in Nelspruit.

OFM Nuus cvdw