Lynette Beer, spreker, skrywer en temperamentkenner, sluit aan by Yolanda Maartens in die Familie Fokusiweek op OFM: Grootmaak vir die Lewe. ’’n Kind hoef nie in ’n huis sonder reëls of meningsverskille groot te word om veilig te voel nie.

Hy moet wel weet: “Ek kan die waarheid vertel sonder om verneder te word. My gevoelens sal gehoor word, al moet my gedrag reggestel word. Die volwassenes se liefde verdwyn nie wanneer ek teleurstel nie.”

Duidelike grense en voorspelbare reaksies help. Wanneer volwassenes verskil, kan hulle wys dat konflik sonder dreigemente, beledigings of stilte as straf hanteer kan word. ’n Kind behoort nie elke dag die vertrek te “lees” om uit te werk in watter bui die ouer is nie.

Kind se binnestem

Die verskil tussen “Jy het ’n onverantwoordelike keuse gemaak” en “Jy is onverantwoordelik” is groot. Die eerste sin wys op gedrag wat kan verander; die tweede plak ’n etiket op die kind. Ons kan ferm wees sonder om te spot, te vergelyk of skaamte te gebruik.

Noem ook wat goed gaan: “Ek het gesien jy het weer probeer” of “Jy was eerlik toe dit moeilik was.” Sulke woorde gee ’n kind ’n beeld van homself wat waarheid en hoop bevat. Wanneer gedrag reggestel moet word, kan jy sê: “Dit was nie aanvaarbaar nie. Ek glo jy kan ’n beter keuse maak en ek sal jou help om dit reg te stel.”

Luister na jou kind

Groet mekaar met aandag wanneer iemand tuiskom. Eet, waar moontlik, saam sonder skerms. Maak verskoning vra deel van die gesinslewe. Vra meer spesifiek as “Hoe was jou dag?” Vra: “Wat was vandag moeilik?” of “Wanneer het jy dapper gevoel?” Selfs tien minute se onverdeelde aandag kan ’n deur vir gesprek oopmaak.

Die dapperste vraag is dalk: “Wat laat ons huis vir jou veilig voel en wanneer voel dit minder veilig?” Luister na die antwoord sonder om dadelik te verdedig. Bedank jou kind vir sy eerlikheid en kom terug met een verandering wat jy bereid is om te maak.

• Probeer vandag: Gee jou kind tien minute se onverdeelde aandag en vra een vraag waarna jy werklik wil luister.

https://www.lynettebeer.co.za/

OFM dg