"Moeg vir swak diens en vervalle paaie!" sê dr. Jack Armour kommersiële bestuurder van Vrystaat Landbou (VL). 

Dit is waarom boere in die Allanridge-omgewing die S-86 met bakkies en sleepwaens blokkeer het om hul misnoeë met die Departement van Paaie te demonstreer weens die departement se onvermoë om die R30-pad te herstel, verduidelik hy.

Hy sê die R30-pad naby Allanridge, wat al as die ‘doodspad’ bekend staan, is al geruime tyd uiters gevaarlik nadat bogemiddelde reënval in Januarie en Februarie voorgekom het en die pad onbegaanbaar maak.

"Die verkeer van die R30 word nou na die S86 geforseer en dit hou 'n gevaar in vir nie net die publiek nie, maar ook die boere en hul werkers,” sê Rudi Jansen van Vuuren, ’n boer van die omgewing.

Intussen sê Armour dat VL al geruime tyd poog om met die Vrystaatse Premier oor die paaiekwessie in die provinsie te vergader, maar dat daar net geen reaksie of terugvoer ontvang word nie.

OFM-nuus/Lee Simmons