Die National African Livestock Farmers Association of South Africa (NaLFA-SA) beywer homself vir die groei en betekenisvolle deelname van swart boere in die rooivleiswaardeketting om betekenisvol by te dra tot die doelwitte soos uiteengesit in die Landbou- en Landbou-verwerkingsmeesterplan.

Aan die stuur is voorsitter, Brenda Maaroganye, van die Sedibeng-distrik in Gauteng. Doelwitte vir haar drie-jaar termyn sluit in verbeterde produktiwiteit van vee en toegang tot grond vir swart veeboere. Maaroganye beklemtoon dat as hierdie twee doelwitte bereik kan word, sal dit ’n deurbraak vir transformasie en insluiting in die landboubedryf wees.

By vanjaar se NAMPO Alfa lewendehawe ekspo buite Bothaville het die NaLFA-SA, wat in Maart as die nuut geposisioneerde National Emergent Red Meat Producer’s Organisation bekend gestel is, ook hul jaarkongres en verskeie werksessies aangebied.

Maaroganye het haar dankbaarheid uitgespreek vir die platform wat Alfa aan die organisasie gebied het. “Hierdie geleentheid stel ons in staat om direk met ons boere in verbinding te tree. Die landbouskou het ’n groot bydrae gelewer tot NaLFA-SA se doelwitte om die uitdagings en geleenthede in die veeboerderybedryf aan te spreek.

Een van die werksessies het behels hoe NaLFA-SA saamwerk met die Rooivleisprodusente-organisasie (RPO) en die ID Scan-stelsel wat biometriese naspeurbaarheid moontlik maak. “Met die ID Scan-stelsel kan boere hul vee as likiede bates gebruik vir finansiële voordele. Hierdie stelsel help ons om die waarde van ons boere se besit, wat voorheen nie as likiede bates erken is nie, by finansiële instellings te laat registreer.” 

Die Landbank het intussen ingestem om vee as ’n erkende bate vir finansiering te beskou – ’n stap wat volgens Maaroganye baie deure vir veeboere kan oopmaak.

Werksessie oor veediefstal by NAMPO Alfa. Foto: NaLFA-SA Facebook

Maaroganye verduidelik met die herstruktureringsproses binne NaLFA-SA die vereniging geskuif het na ’n distrikgebaseerde model, waar elke distrik sy eie uitvoerende komitee het wat dan by NaLFA-SA affilieer. Hierdie model maak voorsiening vir beter organisasie en kommunikasie binne plaaslike boeregemeenskappe.

“Individuele lidmaatskap het nie heeltemal gewerk nie, en ons kon nie al die boere bereik nie. Nou, met die distrikgebaseerde model, kan ons beter beheer uitoefen en seker maak dat al ons lede betrokke bly.”

Verder wil NaLFA-SA veral fokus op die opheffing van bestaansboere wat reeds met groot veekuddes werk, maar nie amptelik as kommersiële boere erken word nie. Maaroganye het ’n voorbeeld genoem van ’n boer wat 350 beeste het, maar nog steeds nie as ’n kommersiële boer geklassifiseer word nie. “Die stelsel was nie regverdig teenoor ons gemeenskapsboere nie. NaLFA-SA se plan sluit in om te vra vir grondtoekennings en huurkontrakte vir hierdie boere, sodat hulle toegang tot lenings kan kry en in die volle waardeketting kan deelneem.”

‘Ons werk aan ’n beter Suid-Afrika vir alle boere’

Hierdie hernude fokus sluit ook jong boere, vroueboere en die ontwikkeling van ’n opvolgplan vir die toekoms in. Die organisasie beplan om hierdie groepe te ondersteun deur opleiding, veral in areas waar boere belangstel om tradisionele metodes en weidingspraktyke te verbeter. “Ons erken die kulturele waardes van swart boere en die praktyke wat hulle verkies. Ons model is buigsaam en ons kyk na die geleenthede in elke distrik om hulle na die volgende vlak te beweeg.”

Maaroganye het haar dank uitgespreek aan verskeie vennote, insluitend die RPO, Red Meat Industry Services, en ander privaat konsortiums, wat hulle ondersteun in hul missie om die landbou-ekonomie te laat groei en nuwe lede te identifiseer wat as sleutelrolspelers in die bedryf kan dien. “Ons werk aan ’n beter Suid-Afrika vir alle boere, ongeag agtergrond of geskiedenis.”

OFM Agri/Elzette Boucher-Krüger