Die projek, “Woolwise”, word vanaf die universiteit se proefplaas bedryf.

“Ons wou graag die volhoubaarheid van landbou bevorder en ons het besluit om die afvalwol te gebruik om vilt met die hand te maak, dit was ’n groot leerproses maar ons het dit reggekry,” sê Doretha Jacobs van die Departement Volhoubare Landbou en Voedselontwikkeling aan die UV.

Die projek is reeds vier jaar aan die gang en het tans vier werkers in diens. Daar word ook produkte van Shwe Shwe-materiaal gemaak, hierdie materiaal is oorspronklik afkomstig van Lesotho.

Die afvalwol word gebruik om produkte te maak soos muurbehangsels, kussings, speelgoeddiere, matte, baadjies  en lampkappe. “Dis ’n baie lang en tydsame proses aangesien die vuil afvalwol eers gewas en gekam moet word voordat enige viltprodukte daarvan gemaak kan word.  Die masjiene wat gebruik word is deur die Departement Instrumentasie by die Universiteit ontwerp en vervaardig en ander is ingevoer.” 

Doretha Jacobs, projekleier van “Woolwise”.

Die Shwe Shwe-produkte sluit in “lanyards”, rompe en kongressakke. Die publiek is ook welkom om enige van hierdie produkte by Woolwise te bestel en dit word volgens spesifieke behoeftes gemaak. Daar word ook geweef en gespin en daar is selfs al vir ’n kliënt ’n matjie van haar hond se hare geweef.

Woolwise produkte wat van vilt en Shwe Shwe materiaal gemaak is.

Studente doen ook praktiese opleiding by hierdie fasiliteit en vrouens van die gemeenskap word gereeld opgelei in kookkursusse, begrotings, polisse, testamente en ook gesinsbeplanning.

Woolwise teddies wat van vilt gemaak is.

“Die uiteindelike doel van hierdie projek en die groot droom is om die viltprodukte uit te voer na ’n mark wat dit kan bekostig en so ons voetspoor internasionaal te vergroot.” 

Die publiek is welkom om die proefplaas te besoek op afspraak.

OFM Landbou/Isabel van Tonder