Die Lekkewaan Groen Trek 2026 sal nie die gewone N1-roete volg nie, maar eerder deur plattelandse gebiede, landboudorpe en boerderygemeenskappe reis. Die veldtog wil boere se rol in voedselsekerheid uitlig en ondersteuning werf vir produsente wat finansieel of andersins swaarkry.

Die span sal die reis in padwaardige elektriese nutsvoertuie aanpak en onderweg boere, landbouondernemings en gemeenskappe besoek. Deelnemers wil ook verhale uit landbougemeenskappe deel en groter bewustheid skep van die uitdagings én bydraes van die sektor.

Die veldtog se organiseerders sê landbou vorm die hart van talle landelike gemeenskappe en dat die Groen Trek juis deur hierdie gebiede sal beweeg om produsente en hul ondernemings sigbaarder te maak. 

Die roete wat gevolg word. Grafika: Instagram

Die roete is ook bedoel om gesprekke met plaaslike gemeenskappe en die breër publiek aan te moedig.

Boere, landbouondernemings, maatskappye, organisasies en lede van die publiek word genooi om by die veldtog betrokke te raak. Ondersteuning kan onder meer deur skenkings, borgskappe, vennootskappe en deelname aan plaaslike besoeke langs die roete gebied word.

Die publiek word ook aangemoedig om die veldtog op sosiale media te deel, terwyl boere hul eie verhale kan vertel en wys wat landbou in hul gemeenskappe beteken. Die organiseerders hoop die veldtog sal sodoende nie net geld insamel nie, maar ook groter begrip vir die landbousektor bevorder.

Die program oor die elf dae. Grafika: Instagram

Alle liefdadigheidskenkings sal deur Agri SA bestuur word. Volgens die organiseerders bied dit ’n gevestigde struktuur vir deursigtigheid en verantwoordbaarheid en moet dit help verseker dat ondersteuning boere bereik wat dit die nodigste het.

Die Groen Trek kombineer dus ’n bewusmakingsveldtog met praktiese fondsinsameling ter ondersteuning van die landbousektor. Die gebruik van elektriese nutsvoertuie vorm deel van die veldtog se kenmerkende benadering, terwyl die roete doelbewus deur landelike gebiede eerder as net groot hoofpaaie sal loop.

Die reis sal oor elf dae strek en in die Moederstad eindig, nadat die span verskeie boerderygemeenskappe tussen Johannesburg en die Wes-Kaap besoek het.

OFM Agri cvs

• Deel jou landbounuus: agri@ofm.co.za.