Dit is daarop gemik om boere, plaaswerkers en landelike gemeenskappe beter te beskerm. Santam het op AgriSA se Kongres 2026 sy voortgesette steun aan landelike veiligheid bevestig met ’n seremoniële tjek aan die Agri Securitas-trustfonds. Die tjek is namens die fonds ontvang deur Cobus van Zyl, voorsitter, en Willem de Chavonnes Vrugt, AgriSA-president, terwyl Fanus Coetzee Santam verteenwoordig het.

NWK se Ysters vir Landbou-inisiatief maak deel uit van die breër poging om geld vir Agri Securitas in te samel en terselfdertyd bewustheid oor landelike veiligheid te bevorder. Die projek bring boeregemeenskappe, ondernemings en ander ondersteuners saam rondom praktiese steun vir veiligheid op plase en in landelike gebiede.

Mosselbaai

Die jongste Taaiste Ysters vir Landbou-uitdaging is op 9 Oktober by Hoërskool Lichtenburg Gimnasium aangebied, waar deelnemers in ’n aflosuitdaging meegeding het. Die volgende geleentheid word op 22 November in Mosselbaai gehou, waar deelnemers weer fondse ten bate van Agri Securitas sal help insamel.

AgriSA sê die betrokkenheid van ondernemings en ander vennote wys hoe samewerking ’n tasbare verskil aan landelike veiligheid kan maak. Ander ondersteuners sluit in CrisisOnCall, Sonfin, Nissan, Tracker, Lekkewaan en Barloworld CAT. Die vennootskappe is daarop gemik om hulpbronne en steun vir landbougemeenskappe verder uit te bou.

Die veiligheidspogings kom te midde van voortgesette kommer oor landelike misdaad. Vrystaat Landbou het onlangs gewaarsku oor ’n toename in misdaadvoorvalle op plase in verskeie dele van die provinsie, met soortgelyke werkswyses wat in meer as een gebied opgemerk is.

Van die jongste voorvalle sluit beweerde pogings in om honde te vergiftig en voertuie of trekkers te steel. Foto: Pexels

Verdagtes is onder meer in die Excelsior- en Hobhouse-gebied in hegtenis geneem, terwyl soortgelyke voorvalle ook vroeër in die Tweespruit-gebied aangemeld is. Vrystaat Landbou sê ander herhalende probleme is onwettige jag met honde, vee- en graandiefstal, asook die diefstal van koperkabels, transformators en sonpompe en -panele. Boerderygemeenskappe word aangemoedig om verdagte aktiwiteite vinnig aan te meld en aktief aan plaaslike veiligheids- en patrollieaksies deel te neem.

Met nog geldinsameling wat vir November beplan word, bly die klem op praktiese samewerking tussen georganiseerde landbou, ondernemings en plaaslike gemeenskappe. Die doel is om nie net op misdaadvoorvalle te reageer nie, maar om veiligheidsnetwerke, toerusting en gemeenskapsbetrokkenheid op lang termyn te versterk.

OFM Agri cvs/dg

• Deel jou landbounuus: agri@ofm.co.za.