Die losvoorspeler, wat op ’n jong ouderdom reeds die Cheetahs aangevoer het, is ’n boorling van Bloemfontein, en vir hom is dit iets besonders om in die unie se 130ste bestaansjaar-wedstryd teen ’n internasionale span te speel.

Die Cheetahs wil hulself meet teen ’n jong maar gedugte Lelos-span, en hulle verwag ’n klipharde wedstryd.

Neels Volschenk. Photo: Morgan Piek

Volschenk het aan OFM Sport gesê dis altyd ’n eer om die wit of oranje trui oor sy kop te trek. “Ek het in Bloemfontein grootgeword en van kleins af – van die oomblik af wat ek kon loop – het ek begin stadion toe kom om rugby te kyk en die Cheetahs te ondersteun,” sê Volschenk.

“Ek weet dus presies wat dit beteken om vir dié unie te speel. Dis vir my ’n ongelooflike voorreg. As span besef ons almal watter groot geleentheid môreaand vir ons voorlê, en ons sien regtig uit daarna.”

Georgië gebruik die wedstryd om te slyp vir hul toets teen die wêreldkampioene in Nelspruit volgende week, maar wil ook aan hul diepte bou vir die 2027 Rugbywêreldbeker in Australië.

Dus sal hul sterspeler, Davit Niniashvili, nie in aksie wees nie, maar hulle is nog steeds ’n sterk span propvol spelers wat in Frankryk vir Top14-spanne soos Montpellier, Lyon en La Rochelle speel, terwyl daar ook baie Black Lions-spelers is wat in die Europese Uitdaagbeker meeding.

Volschenk is ook van mening dat, hoewel hulle as ’n span deeglik getoets sal word, dit ’n gulde geleentheid is om ’n punt te bewys teen ’n internasionale span en om te sien hoe hulle as ’n groep vanjaar gevorder het.

Mikheil Babunashvili. Photo: Morgan Piek

“Dit gaan beslis ’n lekker fisiese wedstryd wees – veral voorlangs, maar ook agterlangs,” het die oud-Grey Kollege-kaptein beklemtoon.

“Daai buite-agterspelers van hulle is dodelik. Ons het teen Lyon geleer hoe gevaarlik daai ouens regtig is. Dis ’n groot uitdaging waarna ons uitsien, veral met die Curriebeker wat voorlê.

“Soos jy gesê het, hulle gebruik hierdie wedstryd om voor te berei vir hul toets teen die Springbokke oor ’n naweek van nou af. Hulle agterste drie is beslis gevaarlik, en ons weet uit vorige ervaring hoe fisiek hulle kan wees.

“Ons sal ons sokkies moet optrek en reg wees vir môreaand.

“Maar dis natuurlik ook ’n gulde geleentheid om jouself te meet teen van die bestes. En ek dink ons het môreaand daardie kans. Ons kan dan ná die tyd sien waar ons as span staan en wat ons spel wys.”

Vrydagaand se geskiedkundige wedstryd by die Toyota-stadion skop om 19:00 af.

Cheetahs - 15 Cohen Jasper, 14 Ntokozo Makhaza, 13 Marko Jansen van Vuren, 12 Ali Mgijima, 11 Banie Britz, 10 Ethan Wentzel, 9 Rewan Kruger, 8 Neels Volschenk, 7 Pierre Uys, 6 Gideon van der Merwe, 5 Victor Sekekete (captain), 4 Pieter Janse van Vuren, 3 Frankie Dos Reis, 2 Marco Janse van Rensburg, 1 Hencus van Wyk

Plaasvervangers - 16 Vernon Paulo, 17 Cameron Dawson, 18 Ben Pitout, 19 Sisonke Vumazonke, 20 Daniel Maartens, 21 Jandré Nel, 22 Carel-Jan Coetzee, 23 Clayton Blommetjies

Georgia - 15 Dachi Papunashvili, 14 Shalva Aptsiauri, 13 Tornike Kakhoidze, 12 Giorgi Khaindrava, 11 Otar Metreveli 10 Tedo Abzhandadze (captain), 9 Tengiz Peranidze, 8 Ilia Spanderashvili, 7 Giorgi Tsutskiridze, 6 Sandro Mamamtavrishvili, 5 Demuri Epremidze, 4 Guram Ghaniashvili, 3 Aleksandre Kuntelia, 2 Irakli Kvatadze, 1 Giorgi Tetrashvili

Plaasvervangers - 16 Vakhtang Jincharadze, 17 Nikoloz Khatiashvili, 18 Beka Gigashvili, 19 Mikheil Babunashvili, 20 Luka Ivanishvili, 21 Vasil Lobzhanidze, 22 Luka Matkava, 23 Demur Tapladze

OFM Sport/Morgan Piek cg