Die Cheetahs is tans die pasaangeërs in die Curriebeker-reeks, maar het laas in Maart 2023 teen die Kwaste geseëvier. Die Griekwas het reeds vanjaar die Cheetahs drie keer geklop: ’n 31-29-sege in die laaste rondte van die SA Beker, en ’n week later 41-38 in die halfeindstryd van die toernooi – albei kragmetings in die Suzuki-stadion in Kimberley. In ’n Curriebeker-oefenwedstryd in Bultfontein het die Poubloues ook met 40-19 gewen.

In die twee spanne se laaste drie buurstryde in die Curriebeker het die Griekwas  verlede jaar in Kimberley met 44-31 koning gekraai, terwyl hulle in 2023 in Bloemfontein met 29-29 gelykop gespeel het. Net meer as twee maande vroeër was die Blikore se laaste oorwinning oor hul bure toe hulle met 42-19 in die Diamantstad geseëvier het.

Daar is geen twyfel dat Vrydag se kragmeting in Bloemfontein weer ’n klipharde wedstryd sal wees nie, en albei spanne sal daarop uit wees om hul beste voetjie voor te sit. Daar is ’n plek in die halfeindstryd op die spel, en die wenner kan moontlik ook ’n tuis-uitspeelwedstryd bespreek.

Die opwindende Vrystaatse skrumskakel Jandré Nel, wat vanaf die plaasvervangersbank gaan speel, het uitgewys dat hulle vanjaar nog onoorwonne op tuisbodem is. Hy het aan OFM Sport gesê hulle gaan dié rekord nie sommer prysgee nie.

“Ons is baie opgewonde om by die huis te speel. Ons is nog onoorwonne hier vanjaar, en ons wil daardie gevoel bou dat dié ’n ‘graveyard’ is,” sê die speler wat gereeld oor die doellyn gaan kuier.

Rewan Kruger in aksie teen die Streeptruie. Foto: Morgan Piek

“Jy kom nie sommer hierheen en dink jy gaan wen nie. Ons wil hê spanne moet weet dis ’n spesiale plek, en ons gaan dit verdedig.”

Nel sê ook hulle fokus is slegs op die buurstryd en dat hulle reeds hierdie naweek wil verseker dat hulle weereens die uitkloprondes van die wêreld se oudste plaaslike rugbykompetisie bereik. “Ek dink die belangrikste is dat as ons Vrydag wen, weet ons ten minste ons het ’n halfeind,” sê Nel.

“Maar ek voel ook ons skuld hulle een – die laaste paar keer wat ons teen hulle gespeel het, het hulle ons net-net gewen, en elke keer as ons Kimberley toe gaan, sukkel ons ’n bietjie. So ons wil Vrydag wys ons kan hulle klop, en dit half verseker ons plek in die halfeindstryde.”

Die stryd op skrumskakel sal ook besonders wees, aangesien drie van die vier skrumskakels in die kragmeting oud-Grey Kollege-leerders is. Nel en die oud-Junior Springbok Rewan Kruger het daar skoolgegaan, terwyl die Griekwas se begin-skrumskakel, Caleb Abrahams, ook daar agter die skoolbanke was. Nel is boonop ’n onderwyser by die skool.

Nel het gesê hy hou Abrahams al lank dop en sien uit na die tweestryd. “Ek het hom van skooldae af gesien en toe al geweet hy’s ’n ystertjie,” sê Nel.  “Dis lekker om weer teen hom te speel. Hy het mooi ingepas by die Griekwas se kultuur en speel regtig goeie rugby. Hopelik kan ek my beste (na die veld) bring en hom ook so ’n bietjie wys hoe dinge hier werk.”

Vrydag se groot buurstryd tussen die Blikore en die Kwaste by die Toyota-stadion skop om 17:00 af.

Cheetahs – 15 Clayton Blommetjies, 14 Prince Nkabinde, 13 Marco Jansen van Vuren, 12 Carel-Jan Coetzee, 11 Cohen Jasper, 10 Franco Smith Jr, 9 Rewan Kruger, 8 Neels Volschenk, 7 Mihali Mosi, 6 Gideon van der Merwe, 5 Victor Sekekete (captain), 4 Juan Venter, 3 John-Kelly Okonkwo, 2 Marko Janse van Rensburg, 1 Hencus van Wyk.
Plaasvervangers – 16 Vernon Paulo, 17 Cameron Dawson, 18 Frankie Dos Reis, 19 Pierre Uys, 20 Daniel Maartens, 21 Jandré Nel, 22 Ali Mgijima, 23 Michael Annies.

Griekwas – 15 Cameron Hufke, 14 Dylan Maart, 13 Zane Bester, 12 Mnombo Zwelendaba, 11 Gurswin Wehr, 10 George Whitehead, 9 Caleb Abrahams, 8 Gustav Erlank, 7 Carl Els, 6 Lourens Oosthuizen, 5 Albert Liebenberg, 4 Malembe Mpofu, 3 Cebo Dlamini (captain), 2 Janco Uys, 1 Eddie Davids
Plaasvervangers – 16 Tiaan Lange, 17 Leon Lyons, 18 Ntobeko Shezi, 19 Derik Pretorius, 20 Marco de Witt, 21 Thomas Bursey, 22 Tom Nel, 23 Connor Mahoney

OFM Sport/Morgan Piek cvs