Die twaalfde gekeurde Suid-Afrikaners het vyf drieë teen hul sterker teenstanders gedruk om agtereenvolgende oorwinnings by die Wêreldbeker te behaal en sodoende te verseker dat hulle na die uitkloprondes deurdring.

Die Suid-Afrikaners se sege teen die Italië was beslis in ’n riller, danksy Sinazo Mcatshulwa se drie ses minute voor die eindtyd om die oorwinning te verseker.

Unam Tose. Foto: Molly Darlington/World Rugby

Drieë deur Aseza Hele, Nadine Roos, Ayanda Malinga en Sizophila Solontsi het Swys de Bruin se span twee keer die voortou gegee, maar ’n dapper Italiaanse span het albei kere teruggeveg.

Uiteindelik was dit egter die span van die suidelike halfrond wat geseëvier het, en die emosie was daar vir almal om te sien toe diegene in groen en goud voltyds opgedaag het en skeidsregter Ella Goldsmith se fluitjie met wilde vieringe begroet is.

Na die oorwinning het afrigter Swys de Bruin gesê dat die harde werk deur die spelers sowel as sy mede-afrigters beslis afbetaal het.

“Nee, dis net genade van bo,” sê De Bruin.

“Ek gaan vir jou sê hoekom – ons weet waar ons was. Jy weet waardeur ons gegaan het en hoe die proses was, maar dis absoluut fantasties.

“Dis nie net een van daai wedstryde nie, dis ’n wedstryd waarin ons vyf drieë gedruk het, waarvoor hulle hard gewerk het, en die plan het gewerk.

“Dis so lekker as die plan werk. Hulle was uitstekend – my afrigters was goed hierdie week, die proses was goed. So ek is baie, baie tevrede.”

De Bruin erken dat hy teen die einde van die kragmeting begin sweet het en net gehoop het dat sy span die knoop sou deurhaak.

Aphiwe Ngwevu - Molly Darlington/World Rugby

“Hulle gaan nie weg nie – en op die einde het ek nogal gedink: gaan ons nie hierdie een laat glip nie? Dank Vader ons het koelkop gebly.

“Daai skrumstrafskop reg aan die einde weet ek nou nog nie hoekom nie, want ons was die dominante skrum heeltemal. Ek moet nou maar ophou daaroor tob – ons moet eers die aand geniet.”

Die Springbok-vroue moet egter nog teen Frankryk te staan kom in hul groepwedstryde, en die kragmeting sal bepaal teen wie Suid-Afrika in die uitkloprondes sal speel. De Bruin sê hulle het reeds baie van hul doelwitte bereik, maar hulle is beslis honger vir meer.

“Dis ongelooflik – dis ’n droom wat bewaarheid is. As jy dink waar ons was en nou skielik praat ons saam met die groot kanonne. Om vyf drieë te druk in só ’n tipe wedstryd is net uitstekend.

Beatrice Veronese - Molly Darlington/World Rugby

“Maar ons is nie klaar nie – ons wil aanhou. Dit is wonderlik. Nog nooit kon ons ’n top-10 span wen nie, nog nooit kon ons ’n kwarteind haal by ’n Wêreldbeker nie. Wat nog te sê van twee oorwinnings uit twee. So ja, ek is ’n baie dankbare afrigter.”

Sondag se kragmeting tussen Suid-Afrika en Frankryk by Franklin’s Gardens in Northampton skop om 17:45 af.

Puntemakers:

Springbok Vroue: Drieë - Aseza Hele, Nadine Roos, Ayanda Malinga, Sizophila Solontsi, Sinazo Mcatshulwa Doelskoppe - Byrhandré Dolf 2

Italië: Drieë - Vittoria Ostuni Minuzzi, Vittoria Vecchini, Francesca Sgorbini, Sara Seye Doelskoppe - Michela Sillari, Beatrice Rigoni

Morgan Piek OFM Sport