Die Kareevlei-myn is naby Daniëlskuil geleë en beslaan 3 000 hektaar in oppervlakte, met vyf diamantagtige kimberlietpype wat na raming minstens 359 000 karaat kan oplewer. Die jongste vonds is meer as 'n dekade sedert BlueRock Diamonds die mynregte op Kareevlei by die Australiese Tawana Resources bekom het, wat sedert 2000 in die gebied begin ontgin het. 

Die mynmaatskapy sê dit is die grootste vonds tot nog toe by die myn en dat meer as tien diamante van gehalte in die afgelope vier jaar hier ontgin is. In 2019 is 'n diamant van 24,98 karaat by die myn ontgin. Dit is vir R2,8 miljoen op 'n veiling verkoop. Die nuutste diamant is volgens die myn meer as dubbeld die grootte van die 2019-vonds en is as 'n D-graad geklassifiseer. 

Die diamant bevat ook gevlekte sulfied-indringings wat die finale prys sal beïnvloed. Die uitvoerende voorsitter van die myn, Mike Houston, se die jongste ontdekking kom 'n week nadat 'n diamant van 21,56 karaat van buitengewone kwaliteit hier ontdek is. Houston sê albei die diamante sal vandeesmaand verkoop word.

OFM-nuus/Roderick Titus