Aansoeke vir die Hooffeesprogram en Vrynge is oop. Alle kunstenaars, vervaardigers en kreatiewe mense word uitgenooi om hul werk vir oorweging voor te lê.

Michael Garbett, feesdirekteur en Juné Pretorius praat met Ashmund Martin in OFM Kunsteklop oor die aansoekproses, die geleenthede wat die fees bied en wat voornemende deelnemers moet weet wanneer hulle hul voorstelle voorberei.

Die aansoeke sluit op 27 November. Die Hooffeesprogram sluit onder meer teater- en musiekproduksies in, terwyl Vrynge ’n platform bied vir opkomende kunstenaars wat gereed is om hul eerste tree op die professionele verhoog te gee.

Garbett sê die aansoek- en keuringsproses is een van die opwindendste dele van die fees. Die hoëgehalte van produksies by die afgelope fees skep groot verwagtinge vir die volgende program en die span sien daarna uit om te ontdek watter nuwe idees, stories en kreatiewe stemme vir 2027 na vore sal kom.

Aansoeke sluit op 27 November vanjaar. Foto verskaf

Die fees bied egter nie net geleenthede vir verhoogkunstenaars nie. Aansoeke vir die Kunstemark het intussen ook geopen, wat kunstenaars, ontwerpers en kreatiewe entrepreneurs die geleentheid bied om hul produkte en skeppings aan feesgangers bekend te stel.

Aansoeke vir die Literatuurfees is ook reeds oop en sluit eers aan die einde van Januarie. Die program bied ruimte vir ’n verskeidenheid aktiwiteite, waaronder boekbesprekings, paneelgesprekke, kinderaktiwiteite, poësievoorlesings, akademiese gesprekke, meesterklasse, werkswinkels en kosdemonstrasies.

Die Vrystaat Kunstefees is in Julie 2027. Foto verskaf

Wanneer die aansoeke vir die Hooffees en Vrynge sluit, begin die keuringsproses, waarna die 2027-program geleidelik vorm aanneem. Dit is die begin van ’n kreatiewe reis waarin nuwe idees en stories uiteindelik hul plek op die verhoog en binne die feesprogram kan vind.

Vrystaat Kunstefees 2027 vind van 6 tot 10 Julie op die Universiteit van die Vrystaat-kampus in Bloemfontein plaas.

Belangstellendes kan die aansoekvorms en verdere inligting op die Vrystaat Kunstefees se webwerf kry. Voornemende deelnemers word aangemoedig om die riglyne vir hul onderskeie kategorieë deeglik deur te lees en die toepaslike sluitingsdatums in gedagte te hou.

OFM dg