LUR Bentley Vass het met die gemeenskap en munisipale werkers vergader waar die betoging vroeër vandeesweek plaasgevind het. Met sy aankoms is die LUR deur die munisipale werkers aangespreek, wat antwoorde gesoek het vir die nie-betaling van hul salarisse. Die werkers het gesê dat hulle nie salarisse vir Desember ontvang het nie en hulle is bekommerd oor wat met die Januarie-salarisse gaan gebeur.

OFM-nuus het vroeër berig die munisipale rekening van Renosterberg is gevries as gevolg van 'n hofaansoek deur Eskom. Die munisipaliteit het geen toegang tot die rekening nie, dus die versuim om salarisse te betaal.

LEES MEER: Eskom nader hof oor munisipale skuld

Vass het verduidelik dat die departement en die munisipaliteit se hande ongelukkig in hierdie saak afgekap is aangesien die saak in proses is by die howe. Totdat die hof 'n besluit neem, kan die rekening nie deur Eskom vrygestel word nie.

LUR Vass het verder verduidelik dat hy met die Tesourie gepraat het om alle moontlikhede te ondersoek wat kan help om die werkers se salarisse te betaal. "Al wat ons nou kan doen, is om op die Tesourie te wag om te hoor hoe ons kan help met die betaling van salarisse, niks wat ons kan doen kan die rekening van Eskom terugkry totdat die saak in die hof afgehandel is nie,” het die Vass gesê.

OFM-nuus/Mia-Leigh Cloete