Gregory Nthatisi, nuutverkose uitvoerende burgemeester, sê hoewel hulle erken die metro het 'n terugslag beleef weens die onbeskikbaarheid van diesel, was die invloed minimaal. Hy sê daar was vir sowat vyf dae geen diesel nie. Hoewel die metro nie van hierdie kwessies kan weghardloop nie, het sekere elemente ook bygedra, insluitende die brandstofprysverhogings.

“Die hele sage het begin toe die pryse gestyg het. Die middelman, van wie ons nog 'n verslag moet kry, het besluit om die proses te frustreer deur diesel teen die hoër prys te verkoop en hy het ook die wagtydperk gemanipuleer. Ons mense het as gevolg daarvan gely. Dit bring my en jou nou by die punt waar ons moet verstaan dat dit onnodig is om sekere verantwoordelikhede wat deur die munisipaliteit bestuur moet word, vir tenders gee om te doen.” 

’n Ingeligte bron het aan OFM Nuus gesê die metro was onlangs weereens sonder diesel en dit het die basiese dienslewering, insluitende vullisverwydering, belemmer.

In uitgelekte kommunikasie is daar beweer dat werkers die afgelope naweek eenvoudig nie by die Noordelike stortingsterrein kon werk om vullis te kompakteer nie.

OFM Nuus het vroeër berig dat R500 000 na bewering weg is of dat daar nie rekenskap van gegee kan word nie.

Dié geld, wat bedoel was om diesel aan te koop om dienste met die metro se vloot voertuie te lewer, insluitende vullisverwyderingsvragmotors, het na bewering weggeraak. Tebogo Motlashuping, voormalige waarnemende munisipale bestuurder, sê ondersoeke het aan die lig gebring dat hierdie eise slegs op bewerings gegrond is.

"Daar was nooit 'n verlies van R500 000 nie. Wat gebeur het, is dat ons verseker dat wanneer diesel en petrol aangekoop word, daar aanspreeklikheid daarvoor is. Daar was laksheid met betrekking tot daardie spesifieke aspek, maar ons het stelsels ingestel om seker te maak dat petrol en diesel verreken word,” het Motlashuping bygevoeg.

Johan Pretorius, DA-koukusleier, sê Motlashuping het bevestig dat hy die betaling van R500 000 goedgekeur het om diesel te koop, maar die geld het sedertdien weggeraak.

Pretorius het voorheen gesê die metro kan rofweg 200 kompak-voertuie met daardie hoeveelheid diesel volmaak.

Die metro het voorheen om al die verkeerde redes opslae gemaak. In April 2022, het die Valke bevestig dat hulle 'n saak van beweerde bedrog en korrupsie by die hoofdepot van Mangaung se vasteafvalbestuur-subdirektoraat ondersoek.

Die ondersoek het die beweerde buitensporige oortydbetalings aan sommige werknemers by die metro se hoofdepot behels. Dit kom ná 'n stortvloed van bewerings van bedrog en korrupsie teen die metro, wat na bewering oor 'n paar jaar plaasgevind het.

OFM Nuus/Lucky Nkuyane