Mangaung-opposisiepartye het belowe om die nuutaangestelde Munisipale Bestuurder, Sello More, in toom te hou tydens sy ampstermyn ná sy verrassende heraanstelling vandeesweek.

Opposisiepartye, insluitend die Vryheidsfront Plus (FF Plus) en DA, het gesê More het die metro onder 'n donker wolk verlaat en sy aanstelling wek ernstige kommer.

Mangaung VF Plus-raadslid, Henry Denner, het gesê More was die waarnemende stadsbestuurder toe daar ’n aanstelling van die sogenaamde spookwerkers was.

“Die ANC het sy meerderheidstem gebruik om weereens die aanstelling van die voormalige stadsbestuurder, mnr. Sello More, deur te dwing. Mnr. More het onder 'n wolk van agterdog by die Mangaung Metro vertrek,” het Denner gesê.

Mangaung DA Koukus-voorsitter, David Masoeu, het gesê die party sal ook seker maak dat More om elke draai aanspreeklik gehou word. Masoue het gesê hy hoop dat More op die kwessies van die metro sal fokus.

“Hy het al voorheen gedien en daar was baie navrae toe hy hier was. Onthou, hy was destyds nie stadsbestuurder nie. Hy het in een van die departemente gedien. Ons hoop is dat dit nie oor kaderontwikkeling gaan nie, maar eerder oor bekwaamheid, met ander woorde hy is verkies omdat hy die beste kandidaat was,” het Masoeu gesê.

More se heraanstelling is op Donderdag (19/10) deur Mangaung se Uitvoerende Burgemeester, Gregory Nthatisi, aangekondig tydens die aankondiging van sy Burgemeesterskomiteelede in Bloemfontein.

More is in 2022 verwyder deur ’n mosie van wantroue deur lede van die raad.

Nthatisi het egter gesê More bring ’n magdom ervaring. Hy het gesê hulle streef daarna om die Metro tot sy eertydse glorie te herstel.

OFM Nuus/Lucky Nkuyane