Central SA
Vermeende transitorowers se saak in Bloemfontein uitgestel─── ZENANDE MPAME 11:41 Thu, 16 Nov 2023
“Die identiteit van die beskuldigdes mag nie nou al bekend gemaak word nie.”
Die saak teen ses vermeende transitorowers is gister tot Dinsdag in die landdroshof in Bloemfontein vir ’n formele borgtogaansoek uitgestel.
“Die hof het ons gewaarsku om nie die identiteit van die beskuldigdes bekend te maak nie omdat dit die ondersoek kan benadeel,” sê Christopher Singo, Valke-woordvoerder in die Vrystaat.
Die mans is Maandag naby Bothaville in hegtenis geneem. Foto: Valke
Die mans word aangekla van roof, poging tot moord, die onwettige besit van vuurwapens en die besit van vermoedelik gesteelde goedere. OFM Nuus het vroeër berig vuurwapens en kontant is in hul besit gevind wat glo tydens die transitorooftog gesteel is.
Die mans het Maandag die geldwa op die hoek van Mill- en Vooruitsigstraat in Hamilton, Bloemfontein, beroof. Hulle is later naby Bothaville in hegtenis geneem.
OFM Nuus/Zenande Mpame Daphné/Corné
