’n Sewe maande oue baba van Meyerton, wat twee keer opehartchirurgie gehad het, is uit die hospitaal ontslaan en sterk tuis aan by sy ouers en broer.

Ruach Combrink het ’n bloedswamvirus opgedoen weens die CVP-lyn wat vroeër vanjaar ingesit is, van waar hulle bloed trek en medisyne toedien.

“Die virus is heeltemal uit sy stelsel en geen oorblywende virusse is in sy stelsel oor nie,” sê sy pa, Jan Combrink.

Ruach Combrink is uit die hospitaal ontslaan. Foto verskaf

“Ons dank God dat daar geen oorblywende virusse is wat deur die bloedswamvirus veroorsaak word nie en ons is almal baie opgewonde en bly om Ruach terug by die huis te hê – veral sy broer wat van die skool af huis toe jaag om saam met sy broer te speel.”

“Dit was emosioneel, maar ek het besef dat dit ’n goeie emosie is wat ons op die oomblik ervaar,” sê Combrink.

“Ja, dit is moeilik want toe Ruach die eerste keer by die huis gekom het, moes ons weer leer om baie dinge te doen as gevolg van die wond. Ons het nie geweet of ons hom op sy bors kon sit of hom drukkies kon gee nie.”

Ruach was sedert sy geboorte in die Netcare Sunninghill-hospitaal in Johannesburg nadat hipoplastiese regterhartsindroom by hom gediagnoseer is.  Die trikuspidale klep, regterventrikel en pulmonêre klep was onderontwikkel of nie gevorm nie.

Toe hy vyf dae oud was, het hy sy eerste opehartoperasie ontvang om ’n stent tussen die pulmonale en aorta-are te plaas. Hy het in Maart ’n Glenn-omleiding gekry waar are in sy nek van die hart verwyder is en dan direk met die longe verbind is.

Die bloedswamvirus is heeltemal uit Ruach Combrink se stelsel. Foto verskaf

“Ons het aan die begin van Junie vir Ruach teruggeneem na die kardioloog vir ’n ondersoek en sy was baie tevrede met hom en dat die operasie ’n groot sukses is,” sê Combrink.

“Toe hy by die huis kom, het hy irritasies in sy mond gehad omdat sy tande gesny en uit sy tandvleis gekom het. Met al die masjiene waarmee ons van die hospitaal af teruggekom het, moet Ruach nog die normale veranderinge waardeur babas gaan ook hanteer.”

“Dit gaan baie goed met Ruach, hy is ongelooflik. Sy naam sê alles, dit beteken die asem van God en jy kan God se asem in alles sien en Sy hand in alles wat Ruach doen.”

Hulle wil graag almal bedank wat vir hom gebid en finansiële bystand verleen het. “Sonder God se genade, barmhartigheid en krag van genesing – ek dink nie ons sou wees waar ons vandag is nie.”

OFM Nuus/Zenande Mpame dg