’n Man (28) van Ganspan naby Jan Kempdorp is deur die polisie se provinsiale eenheid vir ernstige en geweldsmisdaad en die Hartswater-polisie se misdaadintelligensie-eenheid in hegtenis geneem, sê kol. Cherelle Ehlers, polisiewoordvoerder.

Sy sê die polisie in Jan Kempdorp ondersoek ’n saak van moord en poging tot moord in verband met die skokkende gebeure wat in die vroeë oggendure van 27 Julie plaasgevind het.

OFM Nuus het vroeër berig  ’n groep van 14 mans en vroue het omstreeks 03:30 om ’n gesit, gedrink en gekuier. 

Almal het brandwonde opgedoen

Tydens  ’n kragonderbreking daardie oggend het ’n onbekende persoon na bewering  iets in die vuur gegooi wat ’n ontploffing veroorsaak het. Al 14 mense het brandwonde opgedoen. 

“Drie van die slagoffers is later in die hospitaal dood. Die ander slagoffers word steeds vir hul brandwonde behandel.” 

Verdagte sal binnekort in hof verskyn

Hy sal binnekort in die Jan Kempdorp-landdroshof verskyn op aanklagte van moord en poging tot moord. Die ondersoek duur voort.

Enigiemand met inligting kan kol. Letlhogonolo Kanakang by 071 686 1360, kol. Corrie Coghlan by 071 686 0020 of die Stop Misdaadnommer by 08600 10111 bel. Anonieme wenke kan ook gestuur word via die MySAPS-app vanaf ’n slimfoon.
Alle inligting sal as vertroulik beskou word. 

OFM Nuus dg