Jan Gysbert Maritz (57), ’n voormalige prokureur van Matjhabeng-munisipaliteit in Welkom, is Vrydag (10/10) in hegtenis geneem nadat hy die plaaslike owerheid na bewering uit R15 miljoen bedrieg het. Luidens die klagstaaf het hy na bewering geld van ’n regsgeding oorgeplaas na die bankrekening van sy beslote korporasie, Major Issues 314, pleks van om dit te betaal aan Orxy Trading, die maatskappy aan wie die geld verskuldig was.

Maritz staan nou tereg op vier aanklagte, insluitend bedrog, vervalsing en geldwassery.

Jan Gysbert Maritz. Foto: Charne van der Merwe

Maritz is Vrydag (17/10) in die hooggeregshof in Bloemfontein tot drie lewenslange vonnisse en verskeie bykomende tronkstraf gevonnis nadat hy in Mei 2021 skuldig bevind is aan 16 aanklagte, wat verband hou met die seksuele misbruik van minderjariges.

Sy oortredings het tussen 2007 en 2014 op Virginia, Odendaalsrus en in Welkom plaasgevind. Al die slagoffers was destyds jonger as 18. Die vonnisse sal gelyktydig uitgedien word.

Regter Soma Naidoo het beslis Maritz se naam moet by die register van seksoortreders gevoeg word en hy word permanent gediskwalifiseer om met kinders te werk.

LEES OOK: Vrystaatse prokureur kry lewenslank vir seksuele oortredings

Tydens vonnisoplegging het adv. Amanda Bester, die staatsaanklaer, aangevoer Maritz verdien ’n lewenslange vonnis weens die erns van sy misdade en die blywende trauma wat sy slagoffers aangedoen is.

Naidoo het saamgestem en opgemerk Maritz het sy magsposisie en finansiële middele misbruik om sy slagoffers te manipuleer.

Coenie Pieterse, Maritz se regsverteenwoordiger, het om toegeeflikheid gepleit en persoonlike ontberinge en gemeenskapsbydraes aangehaal, maar Naidoo het die argument van die hand gewys. Maritz se gesondheidstoestand het hom nie verhinder om ’n normale lewe te lei nie, het sy gesê.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charné van der Merwe