Die datums vir die besoek deur die portefeuljekomitees oor minerale en petroleumhulpbronne en oor polisie sal bekendgemaak word sodra die nodige parlementêre goedkeuringsprosesse afgehandel is. Inwoners van Heidedal het ’n klagskrif opgestel om hul ernstige kommer uit te spreek oor die voortdurende veiligheidsrisiko’s by die steengroef, waar luidens berigte met die jare reeds sowat 50 verdrinkings plaasgevind het.

Die besoek wil die parlement ’n beter begrip van die situasie op voetsoolvlak gee, aanspreeklikheid van regeringsdepartemente en die Mangaung-munisipaliteit te verseker en direk met inwoners laat skakel oor uitdagings soos veiligheid, rehabilitasie en die nakoming van regulasies.

“’n Petisie bly ’n magtige middel waarmee gemeenskappe die parlement se ingryping kan versoek,” sê Mikateko Mahlaule, voorsitter van die portefeuljekomitee oor minerale en petroleumhulpbronne. “Dit is uiters kommerwekkend dat die waterliggaam nie afgesper is nie, wat die lewens van plaaslike kinders in gevaar stel.

“Die klaarblyklike minagting van verskeie belangrike wette is kommerwekkend, insluitend die Nasionale Omgewingsbestuurswet, die Wet op Ontwikkeling van Minerale en Petroleumhulpbronne en die Nasionale Waterwet.” Die komitees is ontsteld dat, ondanks meer as ’n dekade van gemeenskapsversoeke en talle verdrinkings, geen vinger verroer is die terrein te beveilig of die verantwoordelike partye aanspreeklik te hou nie.

Intussen beskuldig Mangaung-raadslede die metro daarvan dat dit versuim het om inwoners teen hierdie herhalende tragedies te beskerm. Die mees onlangse slagoffer was Benjamin van Wyk (20), wie se liggaam eers ná ’n week se soektog gevind is.

Van Wyk sou op Kersdag 21 jaar oud geword het, luidens berigte. Sy ma het hom beskryf as “’n saggeaarde, welgemanierde kind” wat almal gegroet en met respek behandel het.

Raadslede het dringende optrede geëis om die steengroef te beveilig, die plaaslike swembad te heropen, en te verseker dat die lewens van Heidedal-inwoners waardeer en beskerm word.

“Hierdie steengroef raak by die dag groter,” sê EFF-LP Paulnita Marais. “Toe ek in 1997 hier aangekom het, was dit ’n klein dingetjie. Eendag gaan die huise oorkant die pad vol water wees, want daardie dam raak groter, en my probleem is dat ons net nog meer mense gaan verloor.”

• Het jy ’n nuuswenk om te deel? Bel of whatsapp die OFM Nuuslyn: 066 487 1427.

OFM Nuus/Zenande Mpame mvh