Die Vereeniging/Vanderbijlpark-DBV waarsku dat ’n motor op ’n warm dag binne minute in ’n gevaarlike hitteval kan verander. Selfs wanneer die buitetemperatuur sowat 27 grade is, kan die temperatuur binne ’n geparkeerde voertuig binne 20 minute tot ongeveer 43 grade styg.

Honde kan hul liggaam nie so doeltreffend soos mense afkoel nie en kan daarom baie vinnig hitteberoerte ontwikkel. Dit kan tot orgaanversaking en die dood lei. Die DBV waarsku dat selfs ’n kort wagtyd in ’n warm voertuig gevaarlik kan wees, omdat enkele minute maklik langer word.

Waarskuwingstekens van hitteberoerte sluit in ’n oormatige gehyg of gekwyl, helderrooi of ongewoon bleek tandvleis, swakheid, moeite om te staan, braking, verwarring, ineenstorting en aanvalle. 

Honde kan hul liggaam nie so doeltreffend soos mense afkoel nie en kan daarom baie vinnig hitteberoerte ontwikkel. Foto: Petsuits

Hitteberoerte is ’n veeartsenykundige noodgeval en ’n dier wat dié simptome toon, het dringend hulp nodig.

Die DBV beklemtoon dit maak nie ’n voertuig veilig om die vensters effens oop te laat of in die skaduwee te parkeer nie. Daar is volgens die organisasie geen veilige tydperk wat ’n hond op ’n warm dag sonder toesig in ’n geparkeerde voertuig gelaat kan word nie. 

Mense wat ’n hond in nood in ’n voertuig opmerk, word aangeraai om onmiddellik die DBV of die polisie te kontak. 

Hulle moet die voertuig se ligging en registrasienommer verskaf en beskryf hoe die dier lyk. Nabygeleë sekerheidspersoneel kan ook help om die eienaar so vinnig moontlik op te spoor.

Die eenvoudigste voorsorgmaatreël bly om honde tuis te laat wanneer eienaars inkopies doen of ander sake afhandel. Diere moet toegang hê tot vars drinkwater en geskikte skuiling teen die hitte, veral namate somertemperature in die Vaaldriehoek en elders verder begin styg.

Die Vereeniging/Vanderbijlpark-DBV sê verantwoordelike besluite kan ’n lewe red. Mense kan diere in nood by 016 422 1505 aanmeld en word aangemoedig om vroeg op te tree eerder as om te wag totdat ’n hond reeds ernstige tekens van hitteberoerte toon.

OFM Nuus cvs sm

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.