Haar ouers wag intussen steeds op antwoorde oor die erns van Emily Skye se toestand. Ernstige bragikefalie is reeds vroeg by die nou vyf maande oue baba gediagnoseer nadat spesialiste haar kopvorm ondersoek en skandeer het.

Hulle hoop dat die behandelingsproses die volgende stap sal wees om ’n positiewe verskil aan hul dogtertjie se toekoms te maak, sê Monica de Sousa Alves.

In ’n onlangse spesialis-assessering is bevind haar kefaliese indeks is 103%. “Dit is ’n meting wat die breedte van ’n baba se kop met die lengte daarvan vergelyk. Die spesialis het verduidelik dat die been aan die agterkant van Emily se kop opwaarts groei namate haar koppie ontwikkel,” verduidelik Monica.

Emily Skye het bragikefalie. Foto verskaf

Die bevindinge het die erns van haar toestand beklemtoon. Emily sal Woensdag 28 Oktober haar spesiale kraniale hermodelleringshelmpie ontvang. Dit is ontwerp om haar kop te help vorm terwyl haar skedel nog ontwikkel.

Monica sê dit was moeilik om te hoor hoe ernstig haar dogtertjie se toestand is, maar die spesialis se bereidwilligheid om die gesin tegemoet te kom, het nuwe hoop gebring.

Die gesin se mediese fonds dek nie die behandeling nie, aangesien dit as ’n kosmetiese prosedure geklassifiseer word. Pogings om hulp by staatshospitale te bekom, was ook onsuksesvol. Die behandelingsproses kon egter sonder ’n aanvanklike deposito begin, met die moontlikheid om die koste af te betaal.

Die gesin wag intussen op Emily se mediese verslag en skanderings, wat meer besonderhede oor haar toestand sal verskaf. Sy en Mike van Schoor, Emily se pa, het aanvanklik gehoop die vorm van hul dogtertjie se koppie sou vanself verbeter. Hulle het egter professionele hulp ingewin toe hulle besef het dat hulle nie die risiko wil loop om behandeling uit te stel indien dit nodig sou wees nie.

“Ten spyte van die bekommernisse oor haar kopvorm, ontwikkel sy steeds normaal vir haar ouderdom en bereik sy haar mylpale.” Monica beskryf haar as ’n gelukkige, wakker en liefdevolle babatjie wat ’n groot bron van vreugde vir haar gesin is.

Die koste van die behandeling, asook die gepaardgaande mediese uitgawes en reise, plaas egter druk op die gesin. Die behandeling is voorheen op tussen R45 000 en R60 000 geraam, terwyl die gesin se geldinsamelingsdoelwit R68 000 is. Hulle het tot dusver R14 958 se ondersteuning ontvang.

Emily Skye se ouers wil net die beste vir haar hê. Foto verskaf

Mike is tans die gesin se enigste broodwinner, terwyl Monica voltyds na Emily omsien.

Vir Monica gaan die oproep om hulp egter oor veel meer as geld. “Ons wil hê mense moet verstaan dat geen ouer ooit vir hulp vra as dit nie werklik nodig is nie. 

“Ons wil ook hê mense moet bewus raak van bragikefalie, asook die ander toestande wat babas se kopvorm kan beïnvloed. Dit gee ons hoop en ons besef ons stap nie die pad alleen nie.”

OFM Nuus/Charne van der Merwe cvs

* Het jy ’n nuuswenk om te deel? Bel of whatsapp die OFM Nuus-lyn 066 487 1427.