Andile Mngxitama, ’n parlementslid van die MK-party, beweer in ’n plasing op X dat die ore van Donovan Marx (50), ’n beesboer van Ventersdorp, afgesny is omdat “gronddiewe weier om te luister”. Marx is Woensdag (28/9) op sy plaas tussen Potchefstroom en Ventersdorp oorval, in sy rug geskiet en met ’n mes in die been gesteek voordat sy aanvallers albei sy ore afgesny het.

Die DA, die VF Plus en AfriForum veroordeel die uitlatings ten sterkste en het nodige stappe aangekondig om Mngxitama tot verantwoording te roep. “Die opmerkings is ’n verwerplike poging om marteling politieke legitimiteit te gee,” sê Ian Cameron, DA-LP en voorsitter van die parlementêre polisieportefeuljekomitee.

“Om ’n slagoffer se verminking met ‘gronddiewe’ te vergelyk bied geen bewyse oor die slagoffer of die omstandighede van die aanval nie. Dit is ’n verwerplike poging om marteling politieke geldigheid te gee.”

Hy sê die gebruik van ’n ernstig beseerde man se lyding om rasse-uitlokking aan te wakker, is politieke lafhartigheid en sal geen opbouende bydrae tot landelike veiligheid lewer nie. Die party vra die parlement se gesamentlike etiekkomitee moet die feite rondom die plasing vasstel en bepaal of Mngxitama se uitlatings met parlementslede se etiese verpligtinge strook.

De MK-party moet ook vasstel of Mngxitama die plasing gemaak het, hom van die boodskap distansieer en verduidelik watter tugstappe sal volg as dit wel sy woorde is, sê Cameron. “As Mngxitama die uitlatings gemaak het, moet hy die opmerking terugtrek en skuld hy Marx en sy familie ’n verskoning.”

Die VF Plus gaan ’n amptelike klagte by die Suid-Afrikaanse Menseregtekommissie (MRK) en die parlement se etiekkomitee indien. “Sulke uitlatings is onaanvaarbaar en hoort nie in ’n moderne en beskaafde samelewing nie. Dit is niks anders nie as onverbloemde haatspraak en is tekenend van die barbaarsheid waarmee vele plaasaanvalle gepaardgaan,” sê Heloïse Denner, VF Plus-raadslid.

Mngxitama se uitlatings is ’n poging om plaasaanvalle te regverdig deur boere as sogenaamde “gronddiewe” uit te beeld, meen sy. Elke parlementslid lê ’n eed af om die bepalings van die Grondwet en die landswette te gehoorsaam, wat haatspraak uitdruklik verbied.

Parlementslede onderneem ook om deurentyd só op te tree dat die belange van die publiek en die parlement bo hul eie gestel word. “Mngxitama hoort nie in die parlement nie. Die MK-party moet hom ondubbelsinnig van hierdie uitlatings distansieer en behoort Mngxitama onmiddellik uit die party te skors om te wys dat hy hom nie met sulke gedrag vereenselwig nie.”

AfriForum se regspan gaan Mngxitama aankla, sê Kallie Kriel, uitvoerende hoof. “Hierdie haatdraende uitsprake oor ’n Afrikanerboer wat wreed gemartel is, is nie ’n politieke speletjie nie. Ons is bereid om alle nodige hulpbronne aan te wend om te verseker dat hy tot verantwoording geroep word.”

Marx is steeds in ’n stabiele toestand in die intensiewesorgeenheid van Mediclinic Potchefstroom, maar sy beserings bly ernstig.

OFM Nuus dg

• Het jy ’n nuuswenk om te deel? Bel of whatsapp die OFM Nuus-lyn by 066 487 1427.