Lynette Brummer (64), Anna Fourie (73), Mapaseka Majorobella (35), Nomsa Ngcongwane (55), Ntswaki Mofolo (30) en Puseletso Moloi (33) het Maandag (2/11) weer in die streekhof verskyn. Hulle staan tereg op aanklagte van poging tot moord op Bettie Payne (82), ontvoering en aanranding met die opset om ernstig te beseer.

Die saak is tot 30 November uitgestel nadat die verdediging eers die dossier oor ’n bykomende aanklag, wat op 30 September by die saak gevoeg is, net voor die hofverrigtinge ontvang het.

Die bykomende aanklag, wat glo ook verband hou met die aanranding van ’n bejaarde, is teen die hoofbeskuldigde, Brummer, ingestel. Sy het voorheen ’n senior pos by die versorgingsoord beklee en was ook ’n aandeelhouer.

Die staat het tydens die vorige hofverskyning onderneem om die dossier nog dieselfde middag aan die verdediging te oorhandig, maar dit het nie gebeur nie.

Bettie Payne en haar dogter Mariana. Foto verskaf

“Ons het eers vandag (2/11) die dossier ontvang. Die saak is dus uitgestel sodat ons die nuwe inligting met ons kliënte kan bespreek en daaroor kan konsulteer,” sê Louis Botha, die regsverteenwoordiger.

Die langverwagte verhoor is al verskeie kere vertraag. Die verdediging het voorheen beswaar gemaak teen verdere uitstel nadat die staat sekere inligting nie betyds kon verskaf nie. Die inligting is intussen aan die verdediging oorhandig, maar moes eers met die beskuldigdes bespreek word voordat die saak kon voortgaan.

’n Anonieme bron het voorheen aan OFM Nuus gesê kommer heers dat die slagoffer moontlik nie die geregtigheid sal kry wat sy verdien nie. Die ses beskuldigdes is almal oudwerknemers van die Silver Village-versorgingsoord in Welkom.

Brummer, Fourie, Majorobella en Ngcongwane is op 9 Julie verlede jaar in hegtenis geneem, terwyl Mofolo en Moloi op 14 Julie aangekeer is. Die aanklagte spruit uit beweerde voorvalle waarin Payne na bewering by die versorgingsoord mishandel is.

Puseletso Moloi, Ntswaki Mofolo, Nomsa Ngcongwane, Mapaseka Majorobella, Anna Fourie en Lynette Brummer. Foto: Charne van der Merwe

Sowat 40 video-opnames is as bewysstukke ingedien. Payne se dogter, Mariana, het kort voor die voorval ’n kamera in haar ma se kamer laat installeer nadat sy vermoed het iets is fout. Die beeldmateriaal van 7 Julie verlede jaar wys na bewering hoe Brummer Payne dwing om medikasie te neem, in haar gesig blaas, haar neus toeknyp en op haar spoeg nadat sy geweier het om die medisyne te neem.

Toe Payne na bewering begin skree het, het Brummer glo met kleefband teruggekeer en dit om Payne se mond en kop gedraai. Fourie, Majorobella, Ngcongwane, Mofolo en Moloi word ook in die beeldmateriaal geïmpliseer.

Fourie het na bewering die kamer met ’n selfoon binnegekom terwyl Payne om hulp geskree het, terwyl twee ander personeellede na bewering toegekyk het.

Brummer word voorts daarvan beskuldig dat sy Payne met ’n kombers toegemaak het, gesê het niemand sou haar hoor nie, die lig afgeskakel en die kamer verlaat het.

Brummer is op 18 Julie borgtog van R5 000 toegestaan, terwyl die ander vyf beskuldigdes elk borgtog van R1 000 ontvang het. Die hof het die beskuldigdes vroeër gewaarsku dat die aanklagte ernstig is en dat elke aanklag ’n vonnis van tot 15 jaar tronkstraf kan meebring indien hulle skuldig bevind word.

OFM Nuus/Charne van der Merwe sm

Het jy ’n nuuswenk om te deel? Bel of whatsApp die OFM Nuus-lyn by 066 487 1427.