Onlangse studies toon dat kuns- en kultuurgeleenthede geestesgesondheid ’n hupstoot kan gee, angs en depressie kan verlaag en kritiese denkvaardighede kan verbeter.

Dokters in België het hierdie navorsing ernstig opgeneem en pasiënte kan nou 'n museum- of kunsgalery in die hoofstad, Brussel, besoek om donker denkpatrone te bekamp.

Hierdie inisiatief is 'n program wat van stapel gestuur is om museumbesoeke die status van sielkundige behandeling te gee en waarby vier van Brussel se museums en 'n kunssentrum betrek is.

Johan Newell, 'n psigiater by die Brugmann Universiteitshospitaal, beklemtoon dat museumbesoeke nie as 'n oplossing gesien moet word nie, maar as 'n hulpmiddel in die genesingsproses, saam met ander intervensies soos terapie, medikasie en 'n aanpassing in lewenstyl.

"Ek dink byna enigiemand kan daarby baat," sê hy.

Pasiënte sal vooraf en ná hul uitstappies met hul dokters konsulteer.

LEES OOK: McGregor-museum in Kimberley vier 115 jaar

Pasiënte wat 'n museumvoorskrif kry, kry onder meer gratis toegang om die antieke, ondergrondse paadjies van die Rioolmuseum te verken, 'n stadige wandeling deur die galerye van die Centrale-kunsmuseum te onderneem en die antieke tekstiele by die Mode- en Kantmuseum te bewonder.

Watter bewyse is daar dat hierdie nuwe benadering werk? Volgens 'n oorsig van die Wêreldgesondheidsorganisasie het resultate van meer as 3000 studies oor twee dekades geïdentifiseer dat die kunste 'n groot rol speel in die voorkoming van swak gesondheid, bevordering van gesondheid en die bestuur en behandeling van siektes.

Montreal was die eerste stad ter wêreld wat museumvoorskrifte as 'n vorm van behandeling begin het. "Deur gratis toegang tot 'n veilige, verwelkomende plek te bied, 'n ontspannende, herlewende ervaring, 'n oomblik van blaaskans en 'n geleentheid om bande met geliefdes te versterk, dra by tot die pasiënt se welstand en herstel," verduidelik Montreal se Museum van Skone Kunste op sy webwerf.

Sy projekte help nie net mense met geestesgesondheidsorg nie, maar bied ook hulp aan diegene met eetversteurings, op die outisme-spektrum, mense met intellektuele uitdagings, epilepsie, kanker, Alzheimers asook bejaardes.

Navorsing deur die Universiteit van Londen onthul dat wanneer 'n mens 'n kunswerk sien wat hy besonder mooi vind, dit dopamien in die brein vrystel - dieselfde natuurlike chemiese reaksie wanneer mens verlief raak.

Dit is meer as die spreekwoordelike appel per dag – mense wat tyd in museums en kunsgalerye deurbring, ervaar 'n dieper gevoel van vervulling en konneksie.

En as jy in België is en depressie jou onderkry, is 'n voorskrif vir gratis toegang tot 'n museum dalk net wat jou dokter aanbeveel.

My Modern Met