Lynette Beer, spreker, skrywer en temperamentkenner, sluit aan by Yolanda Maartens in die Familie Fokus-week op OFM: Grootmaak vir die Lewe. Op ’n foto lyk iemand anders se kosblik altyd aanlokliker. Die kind glimlag, die huis lyk rustig en die sportprestasie word gevier.

Ons sien selde die argument in die motor, die moegheid ná werk of die trane agter ’n toe deur. Dan vergelyk ons ons gewone dag met iemand anders se uitgesoekte oomblik en voel ons skielik of ons as ouers tekortskiet.

’n Kind se teleurstelling, moeilike fase of swak keuse is nie vanself ’n verslagkaart oor sy ouer nie. Goeie ouerskap beteken dat ons betrokke bly, liefdevolle grense stel en saam deur moeilike oomblikke werk. Dit vra aandag en verantwoordelikheid, nie volmaaktheid nie.

‘Ek is jammer’

Kinders hoef nie te glo dat grootmense nooit foute maak nie. Hulle moet kan sien wat ná ’n fout gebeur. Jy kan sê: “Ek was ongeduldig. Die manier waarop ek met jou gepraat het, was verkeerd. Dit was nie jou skuld nie. Ek is jammer. Kom ons probeer weer.” So leer ’n kind dat liefde kan herstel en dat elke mens verantwoordelikheid vir sy optrede moet neem.

Daar is wel ’n grens: ’n kind behoort nie die draer van ’n volwassene se probleme te word nie. Verduidelik jou eie gedrag sonder om te verwag dat jou kind jou moet troos of jou emosies moet bestuur.

Genade

Om genade aan jouself te betoon is nie om jou gedrag goed te praat nie. Dit is om eerlik te kyk na wat gebeur het en te vra: “Wat het my ontstel? Wat het my kind op daardie oomblik nodig gehad? Wat kan ek volgende keer anders doen?” ’n Kort pouse voordat jy reageer, kan die gesprek verander.

Jy hoef ook nie elke ongemak vir jou kind weg te neem nie. Soms maak ’n nodige ‘nee’ ’n kind kwaad of teleurgesteld. Jy kan steeds liefdevol, voorspelbaar en naby bly terwyl jou kind daardie gevoel hanteer. Jou teenwoordigheid is groter as jou kind se onmiddellike goedkeuring. 

• Probeer vandag: Herstel een klein oomblik met die woorde: ‘Ek was verkeerd. Ek is jammer. Kom ons probeer weer.’

https://www.lynettebeer.co.za/

OFM dg