Krisztina Ilko (33), wat in die kamers woon wat eens deur die 16de eeuse filosoof, Desiderius Erasmus, by Queens College bewoon is, het gesê sy het die swaar houtdeur in die vensterlose badkamer agter haar hoor sluit.

Ilko, wat vermoed die deur se grendel het gebreek toe ’n loodgieter onlangs aan haar stort gewerk het, sê sy het haarself Donderdag in die kamer toegesluit. Die skoonmakers kom eers Maandae.

“Ek het probeer onthou hoe lank ’n persoon van water alleen kan oorleef en gehoop dat ek nie daar sou sterf nie,” het sy aan BBC News gesê. “As mense na my kom soek, sal hulle in die badkamer ook soek, of ek sou moes wag vir Maandag.”

Sy het gesê haar aanvanklike pogings om te ontsnap was vrugteloos.

“Ek het probeer om die stortkop teen die deur te kap, dit met geweld te breek, om om hulp te skree, maar niks het gewerk nie en niemand kon my hoor nie,” het sy gesê.

Ilko het gesê sy het inspirasie gekry van haar liefde vir MacGyver as kind, ’n vertoning waar die held bekend was vir sy vermoë om alledaagse voorwerpe in nuttige gereedskap te omskep. Sy het besluit om só haar ontsnapping te bewerkstellig.

Ilko het ’n depper van watte gebruik om ’n haak te maak en ’n oogomlynerpotlood gebruik om die grendel af te druk.

Die metode het dié postdoktorale student ná ongeveer 7 uur uit die badkamer bevry.

“Ek was regtig gelukkig en ook nogal trots dat ek my verstand kon gebruik om uit te kom,” het sy aan The Telegraph gesê. “Ek was absoluut verlig.”

Ilko het gesê sy was bang sy word ’n kampuslegende tydens haar beproewing.

“Soms as ek geluide hier hoor, maak ek ’n grap dat dit die spook van Erasmus is. Ek het gedink ek gaan by hom aansluit en ’n Cambridge-legende word,” het sy gesê.

Lees meer