Die projek bou voort op vorige navorsing waarin die insekte met elektroniese miniatuurrugsakkies en elektrodes toegerus is. Dit stel wetenskaplikes in staat om die kakkerlakke op ’n afstand te beheer sodat hulle deur klein openinge en gevaarlike gebiede kan beweeg waar mense of groot robotte nie kan kom nie.

Die grootste uitdaging was egter dat kakkerlakke nie lank onder water kan oorleef nie. Om dié probleem op te los het die span ’n slim asemhalingstelsel ontwerp. In plaas van ’n suurstoftenk gebruik die toestel ’n chemiese mengsel wat suurstof opwek. Die suurstof word dan na die insek se asemhalingsopeninge gelei, sodat dit normaal kan bly beweeg.

Tydens laboratoriumtoetse kon die kakkerlakke onder water teen byna agt sentimeter per sekonde beweeg – net effens stadiger as op droë grond.

Die navorsers glo hierdie “kuberkakkerlakke” kan in die toekoms reddingspanne help om mense in oorstroomde of gevaarlike gebiede op te spoor. Soortgelyke afstandbeheerde kakkerlakke is reeds tydens reddingswerk ná die Myanmar-aardbewing van 2025 gebruik.

En die span droom nóg groter: Hulle hoop die tegnologie kan eendag selfs gebruik word om die oppervlak van Mars te help verken.

Lees meer sm