SWAG (Self-Wearing Adaptive Garments) is futuristiese klere wat hulself kan aantrek danksy klein opblaasbare robotbuisies wat binne-in die materiaal versteek is. Die tegnologie is veral ontwerp om mense met beperkte beweeglikheid te help, soos ouer mense of mense met sekere mediese toestande wat sukkel met alledaagse take soos om ’n hemp of broek aan te trek.

Die stelsel is geïnspireer deur klimop en sogenaamde rankrobotte. Wanneer lug deur die klein buisies gepomp word, rek hulle stadig uit en lei die kledingstuk sagkens oor die draer se liggaam. Afhangend van die kledingstuk kan dit binne ongeveer 10 sekondes aangetrek wees.

Lees ook: Weird Wide Web - Akupunktuur wat verkeerd loop, laat vrou nie loop nie

Die idee het ontstaan toe een van die navorsers in die reën fiets gery het. Hy het gedink aan hoe nuttig dit sou wees as ’n reënbaadjie sommer vanself oor hom kon skuif terwyl hy fiets ry.

Tot dusver het die span reeds selfaantrekkende moue, broeke en selfs vollyfpakke ontwikkel. Die robotbuisies is nog sigbaar binne-in die klere, maar navorsers glo die tegnologie kan miljoene mense wêreldwyd help om meer onafhanklik te leef.

Dit wys maar net, die slimste uitvindings is nie altyd dié wat die meeste geraas maak nie – soms is dit bloot dié wat die alledaagse lewe makliker maak.

Lees meer