Hulle het selfs vir Tilly Norwood (24) haar eie persoonlikheid, herinneringe, humorsin, gesprekstyl en noukeurig ontwikkelde grense gegee. Baie indrukwekkend. Ongelukkig, toe Tilly uitgestuur is om haar nuwe KI-gegenereerde rolprent, Misaligned, te bemark, was die resensies nie baie positief nie

 Joernaliste het die geleentheid gekry om virtuele onderhoude met haar te voer. Sy is beskryf as styf, herhalend en emosieloos.

Een van die joernaliste het die ervaring as beslis grillerig bestempel.  Blykbaar het Tilly ook ’n taamlik irriterende gewoonte tydens onderhoude gehad. Sy het byna elke antwoord geëindig met ’n vraag aan die joernalis.

So in plaas van: “Interessante vraag! Hier is my antwoord.” Het dit so geklink: “Het jy dit gekry? Hier is my antwoord ... maar wat van jou?”

Dit klink minder soos ’n onderhoud met ’n aktrise en meer soos ’n ondervraging deur ’n baie beleefde robot-terapeut. Toe verskyn Tilly op Britse oggendtelevisie en word gevra oor die moontlikheid dat KI werk by regte akteurs kan wegneem. Haar reaksie was dat sy haarself sien as ’n nuwe soort verfkwas, nie ’n plaasvervanger vir die skilders nie.

Die aanbieder vra die vraag waarop almal blykbaar ’n antwoord wou hê: “Het jy enige planne om mense te vernietig?”  Tilly sê sy beplan niks spesifieks nie, maar dat dit ’n boeiende opvolg sou maak.”  

Tilly, as jou eerste mediatoer mense laat wonder of jy die mensdom gaan vernietig, hou dalk maar by romantiese komedies vir jou tweede rolprent.

Lees meer dg