En sake raak heelwat ernstiger as jy ’n gemors op die bus maak of ’n gevaar vir ander passasiers inhou. In sulke gevalle kan die maksimum boete tot 5 000 Singapoer-dollar beloop – ongeveer R65 000!

Die reëls noem nie elke moontlike oortreding nie, maar riglyne vir die toepassing daarvan dui aan dat ernstige morsigheid dinge kan insluit soos om te braak, te urineer, te spoeg of liggaamsvloeistowwe op sitplekke, vloere of handrelings te mors. Selfs om oppervlaktes met kos, modder of vet te bedek kan onder hierdie reëls val.

Singapoer is bekend vir sy streng regulasies in openbare ruimtes – iets wat aan die stad die bynaam “Fine City” (wat “stad van boetes” én “pragtige stad” kan beteken) besorg het. En ja, daardie bynaam word soms op aandenkings vir toeriste gedruk, deels as ’n tong-in-die-kies-verwysing na al daardie boetes … en deels omdat Singapoer bekend staan as skoon en netjies.

Die land het selfs kougom in 1992 verbied nadat weggegooide kougom probleme op die metro veroorsaak het, insluitend vertragings toe kougom aan treindeure vasgeplak en met sensors ingemeng het. Hierdie nuutste reëls bring Singapoer se busstelsel in lyn met sy “Mass Rapid Transit”-netwerk (die metro-stelsel). Amptenare sê die doel is om ’n veiliger, bedagsamer en aangenamer omgewing op openbare vervoer te skep.

Lees ook: Weird Wide Web – Speletjiekampioen eet palings as deel van sy opleiding

En voordat jy paniekerig raak omdat jy dalk per abuis jou toebroodjie laat val: Die owerhede sê omstandighede sal in ag geneem word by die toepassing van die reëls, veral wanneer passasiers fisiese of geestelike gesondheidsprobleme het. So, die volgende keer as jy op 'n bus in Singapoer ry, hou jou voete van die sitplekke af, beheer jou kos … en wat jy ook al doen, moenie ’n gemors maak wat jou R65 000 uit die sak kan jaag nie.

Lees meer sm