Jy kan ’n persoonlike boodskap opneem of jou gunstelingmusiek gebruik. As jy regtig jou familie wil ontstel kan jy vir hulle 24 minute se stilte nalaat met net die gekraak en geklik van die naald wat oor die plaat beweeg.

Die maatskappy se basiese pakket sal jou sowat R70 000 kos. Dit sluit in tot 30 plate en ’n persoonlike Rest in Vinyl-ontwerp. Families kan ook ’n spesiale portret laat maak deur die kunstenaar James Hague wat akrielverf en as gebruik.

Die maatskappy kan reëlings tref om net as van sekere liggaamsdele te gebruik – indien moontlik. Die proses is amper net so vreemd soos die idee self. Eerstens beplan jy die klankopname en die omslagontwerp. Jy woon die finale klankverwerking by, keur ’n voorbeeldplaat en die omslag goed en dan volg die stappe wat dinge effens meer permanent maak.

Nommer ses op die maatskappy se lys is eenvoudig: sterf. Nommer sewe is word veras. Daarna woon ’n geliefde die maak van die plate by en elkeen in die familie kry sy plaat. Die slotgedagte is: Leef voort van anderkant die graf. 

Jy moet egter self seker maak jy kry die nodige toestemming om die musiek te gebruik. As jy dus nog altyd wou hê dat jou plaat moet aanhou draai lank nadat jy die tydelike verlaat het, is dit dalk jou kans.

Onthou, as iemand oor jou musieksmaak kla gaan jy nie meer daar wees om die snit te verander nie. As die platemaatskappy oor jou musiek gedagvaar word, sal hulle maar met jou viniel-as moet onderhandel. Dis nou ’n manier om seker te maak jou laaste optrede is ’n reuse-treffer!

Lees meer dg