Hierdie veiling vind vanaf 13 tot 15 April plaas. 

Sien onderstaande PODCAST

Elmarie Prinsloo, hoof uitvoerende beampte van Bloemskou, deel dat hierdie projek in samewerking met EMSEM en SwiftVee aangebied word. Sy voeg by dat 37 lotte, 700 semen-strooitjies, 11 rasse sowel as 28 stoete op hierdie veiling aangebied sal word.

“Sussex-, Simmentaler-, Santa Gertrudi-, Limousin-, Hereford-, Dexter-, Angus-, Brahman- en Braunvieh-rasse is met van hul top stoettelers se bul-semen op die veiling. Sommige was nog nooit te koop gewees nie, ander is baie skaars, almal waardevol… moet dit nie mis nie!” moedig sy boere aan.

Prinsloo sê die Covid-19 pandemie het, soos in baie ander bedrywe, 'n groot negatiewe uitwerking op sy uitstallers en die betrokkenes van verskeie rasgenootskappe gehad.

Die aanlynprojek is gebore uit die feit dat Bloemskou vanjaar vir die tweede agtereenvolgende jaar gekanselleer sou word, maar die fokus is gedraai op die vestiging van projekte met die missie “Bloem Show, let’s rebuild/Bloemskou, kom ons herbou”. Prinsloo sê ondersteuning vir hierdie projek kom van die grootste telers van die bekendste stoetvee rasgenootskappe in die beesbedryf.

Die jaarlikse Bloemskou is huidiglik slegs een van twee skoue in Suid-Afrika wat ‘n kombinasie van die landbou- en kommersiële sektor op ‘n groot skaal aanbied. Prinsloo sê wat landbou betref, het hulle ‘n groot platform vir die stoetveebedryf, waar verskeie rasgenootskappe hulle kampioenskappe aanbied. Wat die kommersiële kant aanbetref, sê sy het Bloemskou sowat 350 uitstallings wat insluit kosstalletjies, ‘n pretpark en optredes deur verskeie kunstenaars.

OFM-nuus