Johan Breytenbach van die Vrystaatse Sambreel-brandbeskermingsvereniging sê nie al hierdie brande kan positief geïdentifiseer word as 'n veldbrandvoorval nie, want die onderskeid tussen beheerde en onbeheerde brande is nie in hierdie verslag aangeteken nie. 

Sien onderstaande PODCAST

Hy sê die brande wat in Junie-maand voorgekom het, het meer as 53 600 hektaar geraak. Maar, hierdie getal is baie hoër in Mei-maand as wat dit verlede jaar dieselfde tyd was.

Weens veldbrande wat verlede week in die provinsie plaasgevind het, word daar verwag dat die Xhariep-distrik se statistieke ‘n styging sal toon, sê Breytenbach.

Die Thaba ‘Nchu-omgewing was reeds vanaf die tweede week in Julie deur veldbrande geteister. Breytenbach sê dis veral die opkomende boere in dié omgewing wat negatief deur die veldbrande geraak is.

Data oor hoeveel hektaar verlede week in die Vrystaat deur veldbrande verwoes is, is nog nie bekend nie.

Daarmee saam het Vrystaat Landbou (VL) bekend gemaak dat volgens voorlopige data het sowat 67 000 hektaar veld afgebrand. Die organisasie het ook bygevoeg dat die beraamde strukturele skadevergoeding weens brande R2,7 miljoen beloop.

VL het hierdie data ontvang nadat 'n aanlyn-opname gedoen is onder boere wat deur die brande geraak is. Met dit gesê, het 2 017 beeste, 1 953 skape en 415 stuks wild weens die brande gesterf.

Boere se onmiddellike behoeftes sluit in veeartsenykundige voorrade, watervoorsiening, voer en voeraanvullings vir die oorlewende diere, totdat hulle alternatiewe planne kan maak om die winter uit te sien en totdat die weiding hergroei het.

Indien enigiemand belangstel om skenkings te maak kan hulle VL kontak vir kontakbesonderhede van die boerevereniging se verteenwoordigers en voerkoördineerders by verskillende strategiese aflaaipunte.

Besoek VL se webwerf vir meer inligting.

Alternatiewelik kan finansiële bydraes gemaak word aan Vrystaat Landbou, ABSA, rekening nr: 470940670, tak: 632005, met verwysing “FIRES” + selnommer.

OFM-nuus