Paramedici van ER24 het by die toneel opgedaag waar die geldwa in die middel van die pad tot stilstand gekom het met stukke van die voertuig wat waarskynlik weens 'n ontploffing rondom die toneel gestrooi was.

Volgens die ER24-woordvoerder, Russel Meiring, het drie mans geringe tot matige beserings opgedoen. Geen ernstige beserings of sterftes is aangemeld nie. Die mans is vir hul beserings behandel en daarna na nabygeleë hospitale vervoer vir verdere behandeling.

Plaaslike owerhede was op die toneel vir verdere ondersoeke.

'n Ooggetuie het aan OFM-nuus beeldmateriaal gestuur wat wys hoe geld oor die pad gestrooi is. In daardie stadium was polisie nog nie op die toneel nie.

Daar is nog geen duidelikheid rakende wat presies gebeur het nie. OFM-nuus wag op kommentaar van die polisie.

OFM-nuus