Mario Brand het Saterdagaand aan skietwonde beswyk onderweg na die hospitaal.

Volgens polisiewoordvoerder, Mashay Gamieldien, is hy teen 19:45 met 'n skietwond in sy voertuig op Okiep aangetref.

Geen vuilspel word in die stadium vermoed nie.

Sy suster, Marinda Brand Mostert, het Maandag vertel dat Brand trots op sy werk was en altyd gelag het.

"Hy het by my gebly, daarom was ons baie na aan mekaar. Hy het baie hartseer in sy lewe gehad, en altyd maar deur dit voort gewerk. Ons sit ook nou met baie vrae."

Volgens haar is polisiewerk nie maklik nie, want polisiebeamptes “sien en hoor dinge wat die publiek nooit van bewus is nie.”

Sy het ten slotte gevra dat daar vir alle polisiemanne- en vroue gebid moet word, weens die moeilike aard van hulle werk.

OFM-nuus/Isaac Cloete