Volgens ‘n lid van die Vryheidsfront Plus wat in die raad dien, Gerda Senekal, beloop die munisipaliteit se onreëlmatige uitgawes R232 305 800, verkwiste uitgawes R827 881 210 en ongemagtigde uitgawes R2 708 864 475.

Senekal noem verder dat kragverliese in die munisipaliteit 23% of R598 miljoen en waterverliese 63,7% of R733 miljoen van die totale grootmaataankope beloop. “Onwettige krag- en waterverbindings en waterlekkasies dra by tot hierdie verliese,” sê sy.

“Inwoners ervaar daagliks die wanbestuur van die munisipaliteit, waaronder riool wat in strate vloei. 

"Die gehalte van uitvloeisel by die afvalwaterbehandelingsaanlegte voldoen nie aan die voorskrifte van lisensievoorwaardes soos vervat in die Nasionale Waterwet nie. Toetse om die kwaliteit van die uitvloeisel vas te stel is agt maande gelede uitgevoer maar geen maatreëls is daarna getref om aan die wetlike voorskrifte te voldoen nie.”

Die OG se aanbevelings aan die munisipaliteit is:

•  Vakatures moet gevul word;

•  Interne beheer moet versterk word;

•  Bevindinge en oorsake wat in die OG-verslag aangedui is, moet aangespreek word;

•  Aanbevelings en advies om herhalings te voorkom moet uitgevoer word;

•  Maatreëls om prestasie te verseker moet in werking gestel word;

•  Risikobestuur-prosesse moet versterk word.

OFM-nuus