Die gevierde jazz-sangeres is Dinsdagmiddag 14 Maart 2023 oorlede. Sy het in haar lang loopbaan saam met groot musikante soos Hugh Masekela, Sibongile Khumalo, Moses Molelekwa, Tananas en Sipho Mabuse gewerk.

Bosman, ’n boorling van Soweto wie se eerste album in 2001 uitgereik is, het twee Suid-Afrikaanse Musiekpryse (Samas) gewen en is elf keer vir dié prys benoem. Sy het meermale in Huisgenoot Skouspel, op die KKNK en ander groot musiekgeleenthede opgetree.

Die begeleier en musiekvervaardiger, Janine Neethling, vertel sy het saam met Bosman gewerk, van Huisgenoot Skouspel tot die Departement van Kuns en Kultuur, van KKNK tot Bloemfontein, van operahuise tot kroeë.

’n Hoorbaar ontstelde Neethling het Woensdag aan OFM-nuus gesê dit is wreed dat sy dood is: “Ek het haar ontmoet toe sy 18 was, so dis 32 jaar terug. So dis baie water onder die brug; baie, baie konserte … ek kan nie eens [alles] onthou nie.”

Neethling vertel sy het een Vrydagaand ’n waardevolle lewensles geleer toe Bosman by haar kom sit en met haar gesels het. “My lewe was nie eenvoudig op daai stadium nie, en ek het met haar gepraat oor ouerwees, oor my kind.

“En sy het my gegryp en vir my gesê die grootste en belangrikste ding wat sy vir my kan sê, is ek moet geduld hê.

“Jy moet kan herhaal, oor en oor en oor, want hoe’t jy dan nou geleer om te loop en hoe’t jy dan nou geleer om klavier te speel? Het jou spiere onmiddellik geweet hoe om te werk? Nee.

“Jy moet bereid wees om oor en oor en oor dieselfde ding te sê, met liefde. En dit is goed genoeg. Dit is meer as goed genoeg. Jy doen net jou beste, maar jy doen dit met geduld.”

OFM-nuus