Die polisie is nie seker of daar nog mense in die tonnels by die Tweepad-myngebied vasgekeer is nie. Voorlopige ondersoeke dui daarop dat agt delwers reeds Maandag by die betrokke myngebied naby Kleinzee in die tonnels vasgekeer was. Een liggaam is daarna gevind.

Dinsdag het nog tonnels in duie gestort en agt liggame is gevind, het Sergio Kock, polisiewoordvoerder, gesê. Die laaste vier liggame is Woensdagaand na die oppervlak gebring. Die inwoners in die myngebiede is woedend omdat hulle meen die polisie doen al jare nie moeite om hulle teen die “vreemdelinge” te beskerm nie. 

Hulle sê die delwers neem die sakegebied van Kleinzee en Port Nolloth oor en hulle is baie onbeskof en arrogant. Een van die inwoners, Edmund Mouton, sê dit help nie om ander te blameer nie, maar daar moet eerder gefokus word om saam te staan teen die delwers.

OFM Nuus/Isaac Cloete