Central SA
Dit is weer tyd vir Standard Bank Business Relay in Bloemfontein─── ZENANDE MPAME 13:54 Fri, 20 Oct 2023
“Die doelwit is om Bloemfontein se sake- en bestuursgemeenskappe onderling te verenig.”
Inskrywings vir die Standard Bank Business Relay het met meer as 60% toegeneem vergeleke met 2022. Die aflos vind Saterdag (21/10) by die Universiteit van die Vrystaat se Bloemfontein-kampus plaas. Dit begin om 07:00 en eindig om 12:00.
Vir die 140 spanne is daar 12 kategorieë wat insluit onderwys, bankwese, gesondheid en regswese. Elke span bestaan uit vier atlete of stappers wat elk 4 km moet voltooi.
“Ons het die Standard Bank Business Relay vir die laaste paar jaar gedoen en dit is nogal 'n wonderlike geleentheid vir die maatskappy. Die doelwit is om Bloemfontein se sake- en bestuursgemeenskappe onderling te verenig,” sê Brendan Jacobs, hoof van sakebankwese in die Vrystaat en Noord-Kaap.
“Ons het vanjaar ongelooflike pryse van groot borge en elke wenner uit die 12 kategorieë sal ’n prys ontvang,” sê Eslo Coetzee, Vrystaatse voorsitter van The Relay Company.
Dit beloof om pret vir die hele gesin te wees met kosstalletjies en ’n springkasteel vir die kleingoed.
