Die ANC in Noordwes het bevestig dat hy Matlosana se wyk 25-raadslid, wat in polisie-aanhouding is op aanklagte van seksuele misdrywe, afgedank het.

Tebogo Sepale is in Mei in hegtenis geneem en word sedertdien borgtog geweier. Die party se tugkomitee het ’n besluit geneem om Sepale vreedsaam af te dank, sê Tumelo Maruping, provinsiale ANC-woordvoerder. Die vertraging is deur sy verhoor veroorsaak, maar ná verdere gesprekke is dit net regverdig om ’n besluit te neem.

Opposisiepartye in Matlosana het ’n beroep gedoen dat geregtigheid geskied en dat hy afgedank word, terwyl die EFF aan Stella Mondlane, speaker, geskryf het oor beweerde betalings aan Sepale terwyl hy in aanhouding was.

Fikile Oortman, Matlosana-EFF-lid, sê dit is lankal tyd en dat mense van wyk 25 iemand met integriteit en eerlikheid verdien. “Ons sal steeds aan die speaker skryf en versoek dat Sepale sy voordele moet verloor omdat hy betaal is terwyl hy die afgelope ses maande niks gedoen het nie.”

Maruping sê die volgende stap is dat Louis Diremelo, ANC-sekretaris, aan die speaker skryf sodat die raad ’n vakature van die pos kan verklaar.

Sepale, wat daarvan beskuldig word dat hy twee seuns verkrag het, sal na verwagting Woensdag (17/1) sy eerste streekhofverskyning maak, sê Henry Mamothame, Noordwes se NVG-woordvoerder.

OFM Nuus/Joba Matsheng cg