’n Twee jaar en agt maande oue seun van Olifantshoek in die Noord-Kaap het volledig herstel nadat velkanker by hom gediagnoseer is, hy sy sig verloor en ’n geswelde lewer ontwikkel het.

Elvandre Philander kan weer sien, sy lewer is gesond en hy sal sy laaste ronde chemoterapie op 8 Februarie ontvang. Sy ma, Elmorine, sê dat hy begin het om velletsels op sy vel te ontwikkel wat hulle aanvanklik as moedervlekke (moesies) beskou het. Die velletsel het begin groei aan sy lewer, wat dié orgaan laat vergroot het.

Hy het sy sig verloor toe hy een jaar en ses maande oud was. ’n Maand later is daar by hom ’n geval van ’n geswelde lewer gediagnoseer, en net twee maande later ook velkanker.

Elvandre Philander toe hy in die hospitaal was. Foto verskaf

“Sy verlies aan sig is veroorsaak deur die velletsel wat aan sy serebellum gegroei het, waar die brein seine stuur vir jou om te sien, sit, staan, ensovoorts,” het Philander gesê.

Die velletsel het ’n onderbreking tussen die brein en die oog se senuwee veroorsaak, wat gelei het tot die verlies van sy sig.

Sy kanker is ’n seldsame soort velkanker, genaamd sistemiese kinder-xantogranuloom- histiositiese versteuring. Lee-Roy Arendorff, gesinswoordvoerder, sê Elvandre is ’n regte vegter en ’n lewende getuienis dat God bestaan.

Arendorff sê dit is die genade van Bo wat die familie steeds staande hou, want toe die dokters hulle voorberei het vir die ergste, het sy ma en familie geglo dat die Here sou voorsien.

OFM Nuus/Heidrè Malgas  dg