Die DA het ’n klag by die Suid-Afrikaanse Menseregtekommissie (SAMRK) ingedien oor die kritieke toestand van die Dr. Harry Surtie-hospitaal op Upington.

Gesondheidsorg by die hospitaal het tot stilstand gekom nadat die hospitaal se diesel opgeraak het om sy kragopwekker aan te vul. Die kragkrisis het die instelling in duisternis gedompel toe fase 5-beurtkrag begin het.

‘Haglike toestande by die hospitaal vererger’

Die kragopwekkerfout het die reeds haglike toestande by die hospitaal vererger wat al weke lank deur ’n gebreekte lugversorgingstelsel geteister word, sê dr. Isak Fritz, provinsiale voorsitter van die DA en Noord-Kaapse wetgewerlid.

Dit het ondraaglike toestande vir pasiënte en personeel geskep. Dit het ook veroorsaak dat operasies tot stilstand gekom het. Uiterste temperature in die hospitaal het onveilige toestande geskep, veral in die neonatale saal. Infeksiebeheer bly ’n risiko as gevolg van die hitte en gebrek aan sirkulasie. Medisyne is ook bederf omdat hulle in ongeskikte toestande gestaan het.

Organisasies sonder winsoogmerk, politieke partye en die gemeenskap het verlede week by die hospitaal betoog weens die algehele versuim deur die bestuur en die provinsiale gesondheidsdepartement om aandag aan die ernstige situasie te skenk.

’n Versoek deur die DA om ’n dringende vergadering met die Departemente van Gesondheid en Paaie en Openbare Werke te belê om die infrastruktuurbestuur by Dr. Harry Surtie en ander hospitale te bespreek, het tot dusver op dowe ore geval.

‘LUR reageer nie op krisis nie’

Maruping Lekwene, LUR vir gesondheid, het nie op die Upington-krisis gereageer nie en het eerder besluit om ’n mediakonferensie te belê en te spog met die regering se sogenaamde prestasies in gesondheidsorg die afgelope vyf jaar, wat ’n blinde oog op die Upington-gesondheidskrisis gedraai het.

“Die DA het ons kommer oor Dr. Harry Surtie by die SAMRK ingedien, en ons doen ’n beroep op hulle om hervorming binne die openbare gesondheidsorgsektor te help afdwing, wat nie die implementering van die regering se nadelige Nasionale Gesondheidsversekering behels nie.”

OFM Nuus/James Williams  dg/dg