’n Ontluikende model van Bloemfontein wat onlangs op die loopplank in Londen en Milaan gepronk het, en haar ma het aanklagte van bedrog, uitbuiting van ’n minderjarige, mensehandel, kindermishandeling en laster ingedien teen ’n gewilde talentagentskap.

Sy het in Julie by 33andMe aangesluit onder die bestuur van Elsubie Louwrens, sê Shelby Burri (17), maar sy beweer hulle het derduisende rande in ’n bedrogspul verloor.

“Toe ek by 33andMe aansluit, is ek ingelig dat ek aan die International Arts Talent Showcase (IATS)-oudisies moes deelneem, maar ek moes betaal om deel te neem. Hoewel my aansluitingsfooi van R4 950 my oudisie ingesluit het, moes ek weer betaal.”

Sy is genooi om aan die afdelings vir modellering en toneelspel in die Showcase deel te neem, waar sy “eksklusief” uitgenooi is na EMS Paris 2024, ’n beurs van die Amerikaanse Akademie vir Musiek en Toneelkuns gekry het en een van die top-20-modelle was.

“In Oktober het ons die EMS-pakket van R72 000 betaal, vlugte en akkommodasie uitgesluit.”

Elsubie Lourens van 33andMe talentagentskap. Foto: Facebook

Laat verlede jaar het Louwrens gebel om te sê Burri is deur ’n ontwerper vir die Londense en Milaan-modeweek bespreek. “Louwrens het gesê daar was ’n ‘ontwerpersfooi’ of ’n ‘varsgesigfooi’ van $1 750 (meer as R32 000). Elsubie het voortdurend geëis dat hierdie geld in haar private PayPal-rekening betaal word.”

In Milaan het ’n medemodel haar vertel hoe Louwrens na bewering mense belieg en bedrieg. “Van daar af het ek die model gevra om alles aan my ma te vertel wat sy vir my gesê het. Ons het uitgevind dat die ontwerpersfooi nie eens bestaan nie en dat dit nie betaal hoef te word nie.”

Sy sê die feit dat Louwrens ’n onbekende persoon in New York betaal het om hulle te vra of die modelle in Londen en Milaan kon loop, beteken dat sy blatant gelieg het oor Burri, wat spesifiek deur ’n ontwerper vir Londen en Milaan bespreek is.

‘Niemand het geweet wie ons was nie’

Die aand van die aanpassings voor die vertoondag in Londen het hulle vasgestel die lokaal is ’n kelder van ’n London hotel. “Niemand het geweet wie ons was nie en daar was geen spesifieke ontwerper nie.

“Louwrens het vir my gesê die ontwerper wil hê my hare moet lank en swart wees; so ek het my hare swart gekleur en verlengings gekry wat R4 000 gekos het, net om uit te vind dat daar aan die einde geen ontwerper was nie.

“Sy het ons die lokaal ingesmokkel omdat ons nie op enige lys, besprekingsvorm of ontwerperslys was nie. Die produksiehuis het geen idee gehad wie Elsubie Louwrens en 33andMe is nie.”

‘Ek het nie ’n enkele werk van 33andMe gekry nie’

Vandat sy by 33andMe aangesluit het, het haar gesin R291 000 aan Louwrens betaal. Burri beweer sy is “misbruik, mishandel, belieg en belaster”.

“Selfs tot vandag toe het ek nie ’n enkele werk van 33andMe gekry nie en selfs nou het Louwrens by ’n boot camp oor my gepraat en vir almal gesê dat ek oneerlik is en ek soos ’n diva optree.”

Modelle dwarsoor Suid-Afrika beweer hulle het ook in Louwrens se strik getrap en duisende rande verloor.

Louwrens en haar prokureur het nie op enige van OFM Nuus se navrae gereageer nie.

OFM Nuus/Heidrè Malgas mvh