’n Groot gebied van Sentraal-Suid-Afrika kan sneeu verwag, insluitend dele van die Noord-Kaap, Gauteng, Noordwes en Suid-Namibië.

Volgens Snow News kan die suidelike dele van die Noord-Kaap, rondom Sutherland, plek-plek 5-10 cm sneeu kry.

Gewoonlik wanneer ’n sterk kouefront ná maande se warm weer opdaag, vang dit mense dikwels onkant, wat lei tot veeverliese en selfs die verkluiming van mense en diere, en skade aan gewasse, aangesien mense nie verwag dat dit “so vinnig so koud” sou word nie.

Foto: Snow News

Afgesien van sneeuvoorspellings vir die Matroosberge en omliggende berge van die Wes-Kaap, is ligte sneeu ook moontlik in die Oos-Kaap tot in Lesotho, al langs die Drakensberge en dorpe aan die voet van die Drakensberge.

Die huidige weermodelle toon selfs ’n geringe kans op sneeu in die Noordoos-Vrystaat.

Die kouefront weens ’n sterk frontale depressie sal na verwagting Donderdag in die Kaap aankom. Asof die kouefront nie genoeg is nie, sal ’n afsnylaagdrukstelsel ook Saterdag net wes van Suid-Afrika ontwikkel, wat selfs verdere ongunstige weer na groot dele van SA sal bring.

Dit sal die eerste kouefront in minstens sewe maande wees wat ’n aansienlike daling in temperature meebring. 

Die Suid-Afrikaanse Weerdiens het in sy streekvoorspelling ook ’n geel vlak 2-waarskuwing uitgereik vir skadelike wind en die gepaardgaande risiko van brande, wat vinnig kan versprei oor die oostelike en suidelike dele van Noord-Kaap, Suidwes-Vrystaat, die noordooste van die Wes-Kaap, sowel as die Noordoos-Kaap.

Koue tot baie koue weerstoestande sal na verwagting tot volgende week oor die meeste dele van die land voortduur. Oggendryp sal na verwagting ook volgende week oor groot dele van Suid-Afrika ontwikkel.

OFM Nuus mvh