Die N1 suidwaarts by Bloemfontein was Woensdag (10/7) vir ‘n geruime tyd gesluit ná ‘n ongeluk.

“Die een vragmotor het teen ‘n ander stilstaande vragmotor gebots,” sê Sinah Mpakane, polisiewoordvoerder. Die ongeluk het ‘n verkeersophoping tussen die Kenneth Kaunda-afrit en die Nelson Mandela-afrit veroorsaak.

Die vragmotor wat teen die stilstaande vragmotor gebots het. Foto: OFM Nuus

“Tydens die verkeersopeenhoping het ongeduldige motoriste, asook ‘n vragmotorbestuurder op die middelman van die snelweg gery om die ongelukstoneel te vermy. Die vragmotor se vrag was egter te swaar en dit het die vragmotor laat kantel,” sê Mpakane.

Die vragmotor het omgeslaan omdat sy vrag te swaar was. Foto: OFM Nuus

Een persoon is ernstig beseer en nog een het matige beserings opgedoen. 

OFM Nuus het vroeër berig 'n polisieman wat van diens af was, is in hegtenis geneem ná ’n beweerde ongeluk Maandag (8/7) in De Aar. 

“Omstreeks 16:30 het die beampte  met sy private voertuig in ’n huis vasgery, terwyl hy onder die invloed van drank was,” sê Sergio Kock, polisiewoordvoerder.

Die 35-jarige konstabel verbonde aan die polisiespeurdiens in Vosburg is nie beseer nie en is op die toneel in hegtenis geneem.

 Die ondersoek duur voort.

OFM Nuus dg