Elektrisiëns was Maandag (22/7) by die Queens Fort- militêre museum besig om die elektrisiteit te probeer herstel.

Hulle het gesê dit sal Dinsdag (23/7) herstel word en dat dit lyk of kabels gesteel is.

Die museum is sedert Januarie 2023 vir die publiek gesluit, nadat sy krag weens uitstaande skuld afgesny is.

Die museum het historiese, militêr-gesentreerde uitstallings, saam met ’n tenk en vegvliegtuig. Dit beeld alle groot oorloë in die Vrystaat uit die 1800’s uit. Die gebou is in 1848 opgerig en in 1849 vir die eerste keer in gebruik geneem.

Met die jare is dit gebruik as ’n militêre hoofkwartier, ’n hospitaal, ’n geestesinrigting en ’n tronk.

“Krag is na die museum afgesny weens agterstallige rekeninge,” sê Ntombizanele Sifuba, LUR vir sport, kuns, kultuur en ontspanning. “Maar ek kan bevestig dat die departement van openbare werke nou die uitstaande skuld vereffen het en die kragvoorsiener Centlec by verskeie geleenthede sonder welslae versoek het om toevoer na die museum te herstel, sonder sukses.”

Die museum het historiese, militêr-gesentreerde uitstallings, saam met ’n tenk en vegvliegtuig. Foto: Zenande Mpame

“Die museum is een van Bloemfontein se mees ikoniese en oudste bakens, en dit huisves ’n indrukwekkende versameling artefakte, wat groot militêre konflikte van die 1820’s tot die 1990’s uitbeeld,” sê Werner Pretorius, DA-woordvoerder van sport, kuns, kultuur en ontspanning.

“Die DA het die LUR vir sport, kuns, kultuur en ontspanning aangemoedig om te verseker dat die kragtoevoer na die Militêre Museum sonder verwyl herstel word en dat die museum weer vir die publiek oopgestel word.

“Die DA doen ook ’n beroep op die LUR om die besoekure van museums regoor die provinsie te verseker, aangesien die meeste op Saterdae gesluit is wanneer die publiek meer tyd het om dit te ervaar.”

Die museum is sedert Januarie 2023 vir die publiek gesluit, nadat sy krag weens uitstaande skuld afgesny is. Foto verskaf

’n Veiligheidswag by die museum het aan OFM Nuus gesê die museum behoort Dinsdagoggend oop te wees, aangesien tegnici op die toneel is en die elektrisiteit probeer regmaak.

Lele Mamatu, woordvoerder van Centlec, het gesê die kragvoorsiener het daaraan aandag gegee, maar dit blyk nou dat die probleem op “hul terrein” (die museum) is.

OFM Nuus/Zenande Mpame mvh