’n Reeksverkragter het Donderdag (15/8) in die Welkom-landdroshof verskyn nadat sy DNS hom met 12 sake verbind het.

Richard Bongani Mazibuko (42), wat ook die van Dlangezwa gebruik, is in hegtenis geneem nadat hy met 12 sake verbind is. 

Dié gevalle is in Welkom, Thabong, Bultfontein, Bothaville, Odendaalsrus en Virginia aangemeld. Die sake dateer so ver terug as Januarie 2011 toe hy by ’n huis ingebreek het, die meisie (12) wat hy in die huis gekry het verkrag het en waardevolle items uit die huis in Welkom gesteel het. 

‘In sommige voorvalle, sou Mazibuko die vrou verkrag’

Sy kriminele gedrag het vererger en hy het medepligtiges gekry wat saam met hom na huise sou gaan, die inwoners beroof en dan, in sommige voorvalle, sou Mazibuko die vrou verkrag.

Die saak is na die reeks- en elektroniese misdaadondersoekeenheid (SECI) in die Vrystaat oorgeplaas om die verband tussen al die gevalle, in samewerking met die NVG, te bepaal.

Mazibuko het vlugtig in die hof verskyn en die saak is tot 22 Augustus 2024 vir verdere ondersoek uitgestel.

OFM Nuus cg