Jan Gysbert Maritz (57), ’n prokureur van Welkom, is in die hooggeregshof in Bloemfontein skuldig bevind op 16 aanklagte, insluitend drie van verkragting, en aan verskeie ander seksuele oortredings waarby minderjariges betrokke was. Sy vonnisoplegging, wat vroeër vandeesweek voor regter Soma Naidoo begin het, volg op jare van regsvertragings, appèlle en argumente van albei kante.

Maritz se oortredings is oor ’n tydperk van sewe jaar tussen 2007 en 2014 in Virginia, Welkom en Odendaalsrus gepleeg. Al sy slagoffers was onder die ouderdom van 18 ten tyde van die voorvalle.

In Mei 2021 het Maritz aanvanklik alle aanklagte ontken toe die verhoor begin het, maar vier dae later formele erkennings ingevolge Artikel 220 van die Strafproseswet gemaak. Gebaseer op hierdie erkennings is hy op 16 aanklagte skuldig bevind. 

Aansoeke onsuksesvol

Hy het oorspronklik tereggestaan op 18 aanklagte kragtens die Strafregwysigingswet (Seksuele Misdrywe en Verwante Sake), wet 32 van 2007, sowel as een van aanranding. Albei sy latere aansoeke – een wat versoek dat regter Naidoo haar onttrek weens beweerde vooroordeel, en ’n ander om sy skulderkenning tersyde te stel – was onsuksesvol.

Maritz het met sy verskyning Woensdag 8 Oktober oënskynlik weer probeer om die verrigtinge te vertraag deur aan te voer dat hy nie ’n Sertifikaat van Verskyningsreg in Howe het nie, wat toon dat ’n regspraktisyn die reg het om in sekere howe op te tree, veral in hoër howe soos die hooggeregshof. Hy sou dus nie homself kon verdedig nie.

Die hof het hom opdrag gegee om regsverteenwoordiging te bekom. Hy het daarna die dienste van adv. Coenie Pieterse verkry, wat die hof verseker het hy is gereed om Maritz te verteenwoordig.

Weer in hegtenis geneem

Regter Naidoo het gewaarsku as Pieterse om enige rede nie kan voortgaan nie, sal sy die verrigtinge met of sonder regsverteenwoordiging vir Maritz hervat.

Intussen is Maritz verlede Vrydag (10/10) in hegtenis geneem in verband met ’n bedrogsaak.

Sy vonnisoplegging Dinsdag (14/10) moes uitgestel word omdat hy nie behoorlik met sy regspan kon konsulteer terwyl hy in aanhouding was nie. Naidoo het beklemtoon die uitstel is nodig om te verseker dat Maritz en sy regspan kan voorberei, maar sy het dit duidelik gemaak die saak sou Woensdag hervat word.

Munisipaliteit glo bedrieg

Maritz se bedrogsaak hou verband met sy werk by die Matjhabeng-munisipaliteit. Hy het na bewering die munisipaliteit uit R15 miljoen bedrieg deur geld in ‘n regsgeding in die bankrekening van sy beslote korporasie, Major Issues 314, in te betaal en nie aan Orxy Trading, vir wie die bedrag geoormerk was nie.

Hy staan tereg op vier aanklagte, insluitend bedrog, vervalsing en geldwassery. Sy borgtogaansoek in die bedrogsaak het Maandag begin en sal volgende Dinsdag voortduur.

Met Donderdag se verrigtinge het die aanklaer, adv. Amanda Bester, aan die hof gesê sy glo Maritz moet die res van sy lewe agter tralies deurbring. Sy het verwys na die erns van sy misdade en die blywende skade wat sy slagoffers opgedoen het.

‘Hy het nog altyd as man en vader vir sy gesin gesorg’

Pieterse het egter vir versagting gepleit en gesê Maritz het reeds sy gesin tydens die verloop van die saak verloor. Hy het gesê sy kliënt, wat voorheen as prokureur vir die munisipaliteit gedien het, het positiewe bydraes tot die gemeenskap gelewer – insluitend finansiële skenkings aan skole. 

Hy het nog altyd as man en vader vir sy gesin gesorg. Hy het ook verklaar dat Maritz aan ’n harttoestand ly en ’n eerste oortreder is.

Die saak duur Vrydagoggend voort wanneer regter Naidoo na verwagting die langverwagte vonnis sal lewer.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe