Central SA
Vermoorde Glen-kleuter se ma gaan om borgtog aansoek doen─── ZENANDE MPAME 08:47 Sat, 22 Nov 2025
Sy ma sal Donderdag (27/11) weer in die Bloemfonteinse landdroshof verskyn om formeel aansoek om borgtog te doen. Sy word van moord en ontvoering aangekla.
Vuyiswa Leeuw (29), die ma van die vermoorde Katleho Leeuw, het Donderdag (20/11) vlugtig in die hof verskyn en bly in aanhouding. Op die dag van haar hofverskyning was dit die begrafnisdiens van Onkarabetse Leeuw (5) by die begraafplaas in Glen.
Onkarabetse is langs sy kleinniggie Katleho Leeuw (5) begrawe. Sy is in Oktober vermoor en seksueel aangerand. Onkarabetse se pa (30) is in hegtenis geneem vir die beweerde moord en seksuele aanranding.
Die Vrystaatse polisie ondersoek steeds die saak in Glen noord van Bloemfontein waarin die kinders kort ná mekaar vermoor is.
“Ek is verbaas dat twee kinders wat familie is onder soortgelyke omstandighede gesterf het,” sê MaQueen Letsoha-Mathae, premier. “Nog erger is die feit dat twee naasbestaandes van die slagoffers in hegtenis geneem en van hul moord aangekla is.
“Niks regverdig mense om hul eie wet toe te pas nie. Die twee kinders is kort ná mekaar onder soortgelyke omstandighede dood en beide hul oom en tante word van hul moord aangekla.”
Onkarabetse se ma, Rethabile (20), ’n niggie van Leeuw, het haar seun op 8 November by die Glen-polisiekantoor as vermis aangemeld. Ná 'n uitgebreide soektog is sy liggaam vier dae later onder ’n kartondoos in digte plantegroei naby Glen gevind.
Katleho (3), haar kleinniggie, is op 23 Oktober as vermis aangemeld. Haar liggaam is twee later ook in digte plantegroei gevind.
Die pa wat aangekla word is in die Vrystaatse Psigiatriese Hospitaal vir sielkundige waarneming opgeneem en sal op 4 Desember weer in die hof verskyn.
Die media mag nie foto's van hom neem voor die sielkundige waarneming nie afgehandel is nie, want sy huisdokter het bevind hy was nie bewus van wat hy gedoen het nie.
‘Dit was bloot boos’
“Hierdie voorval in Glen gaan na my mening verder as wat ons as gesinsgeweld ken en dit was bloot boos,” sê Elzabe Rockman, LUR vir landbou. “Om ’n driejarige kind aan verkragting en moord bloot te stel is opsetlik.
“Die kind is uit ’n groep geneem waar sy met ander gespeel het. Dit het nie per ongeluk gebeur nie.”
• Het jy ’n nuuswenk om te deel? Bel of whatsapp die OFM Nuus-lyn: 066 487 1427.
